Ќе се построи ли СДСМ зад Левица?

Се обединува ли македонската левица?

Кога би бил злобен, во стилот на ведетите од Бихаќка, чии тажни трикови и манипулации јавно ги артикулира портпаролката Богданка Кузеска, би рекол – да.

Би рекол, СДСМ и Левица на Димитар Апасиев се обединуваат. Ако не баш идеолошки, тогаш во политичката акција.

Би рекол попрво, СДСМ се строи зад Левица.

И би додал, на американската амбасадорка Агелер тоа сигурно многу ѝ се допаѓа.

Но, иако на некои им е тешко да поверуваат во тоа, кај мене, кога е во прашање СДСМ, нема ни грам злоба. Бидејќи оној СДСМ што јас го познавам од едни други времиња, да не речам оној СДСМ што јас го замислувам, сигурно не се луѓето кои во последните десеттина години го обезличија и го упропастија.

Нејсе, политиката не живее во моите замисли, туку во реалноста. А таа, реалноста, во случајов е сурова и политичката логика е многу едноставна.

Имено, нема зошто Богданка и СДСМ да бараат премиерот Христијан Мицкоски итно да го сменел Африм Гаши од функцијата собраниски спикер и згора да му ветуваат поддршка на ВМРО-ДПМНЕ за тоа.

Ако СДСМ смета дека инцидентот со косовската претседателка Вјоса Османи на скопскиот аеродром и замешателството на Гаши се доволна причина за еден ваков потег, нека повелат нека си гласаат за смена на спикерот.

Брзо ќе имаат можност за тоа. Левица веќе поднесе интерпелација за Африм Гаши. А секоја интерпелација завршува со гласање.

Патем речено, јас сум сигурен дека другарката Агелер ќе му каже на другарот Венко Филипче неговата партија да гласа за смена на Гаши.

Во оваа прилика, јас не навлегувам во расправа за аргументите „за“ и „против“ Гаши. Едноставно, велам дека би постапил така како што би постапил и човекот носител на книшката број 1 на СДСМ, стариот лисец Киро Глигоров – за шницла вол не се коле, велеше тој.

ВМРО-ДПМНЕ веќе се огласи дека нема да поддржи смена на Африм Гаши. Така би постапила секоја одговорна политичка партија – еден банален инцидент, па и повеќе такви, сепак не се доволна причина да се растури нешто што е составено со добра мисла и со многу труд. Ставот на ВМРО-ДПМНЕ е чин на зацврстување на довербата меѓу коалициските партнери во власта.

А Бихаќка има избор – нека си гласа за интерпелацијата на Левица!

Ионака Димитар Апасиев пред изборите најави дека многу брзо неговата партија ќе го преземе приматот од Бихаќка, а СДСМ ќе се „пасокизира“.

Како тргнале „генијалциве“ на чело со Филипче, нема да биде изненадување и тоа да се случи.

За жал…