ЌЕ СЕ ГРАДИ ПРЕМИНОТ МИРАТОВАЦ-ЛОЈАНЕ Србија ќе распише тендер во мај
Во февруари минатата година, српскиот претседател Александар Вучиќ изјави дека Србија прави сѐ за да го отвори новиот граничен премин Миратовац-Лојане.
Српската републичка дирекција за имот го огласи претходното соопштение за датумот за распишување на тендерот за изработка на планска документација за седум гранични премини, меѓу кои е и граничниот премин Миратовац-Лојане со Северна Македонија, јави дописникот на МИА од Белград.
Тендерот се планира да се распише на 9 мај, а како што соопшти бизнис порталот Екапија, станува збор за граничните премини Јаша Томиќ, Калуѓерово, Келебија, Ѓердап 1, Јабука, Љуба и Миратовац-Лојане.
Сите споменати гранични премини се веќе постоечки, па се претпоставува дека за нив ќе се направат проекти за реконструкција, освен за граничниот премин Миратовац-Лојане кој треба целосно да се изгради.
На крајот на 2019 година Србија и Северна Македонија потпишаа договор за воспоставување нов заеднички граничен премин Миратовац-Лојане. Во февруари минатата година, српскиот претседател Александар Вучиќ изјави дека Србија прави сѐ за да го отвори новиот граничен премин Миратовац-Лојане, дека има значителен интерес од Албанците кои живеат од другата страна на српската граница овој премин да се отвори, „но дека тоа не е едноставна и лесна работа“.
– Не поради политички причини, туку затоа што треба секојдневно да плаќате луѓе кои ќе работат. Тоа се наши зголемени трошоци, а ние бараме да ги намалиме трошоците, но не грижете се и таа работа ќе ја завршиме – кажа Вучиќ.