ЌЕ РАСТАТ ПЛАТИТЕ НА СИТЕ ВРАБОТЕНИ, ОСВЕН НА ФУНКЦИОНЕРИТЕ Мицкоски најавува повисоки примања во 2025 година
Со измени на законското решение ќе нема покачување на функционерските плати, рече денеска премиерот Христијан Мицкоски.
Ќе растат платите на сите вработени во 2025 година, а нема да растат платите на функционерите, рече денеска премиерот Христијан Мицкоски, одговарајќи на новинарски прашања за измените на Законот за платите на избраните и именуваните лица, што се во тек во Собранието.
– Тоа го правиме, со измени на законското решение ќе нема покачување на функционерските плати. Оваа измена на законот наскоро ќе биде пред пратениците. Ќе работиме сите вработени да имаат повисоки плати. Така ќе работиме, во интерес на граѓаните – рече премиерот Мицкоски.
Во Собранието во тек е процедурата за измени на Законот за плата и други надоместоци на избрани и на именувани лица, со кои ќе се намалат коефициентите со кои се множи основицата за пресмета на платите. Со ова намалување на коефициентите, платата на функционерите нема да се зголеми од јануари 2025 година, кога се усогласува со просечната плата од претходната година.