ЌЕ ИМА НОВА ТРАСА НА АВТОПАТОТ ВО ОХРИДСКИОТ РЕГИОН, АКО УНЕСКО НЕ ЈА ОДОБРИ СЕГАШНАТА Мицкоски порача дека стружани не се заборавени од Владата

Владата е подготвена да разгледа нова траса за автопатот Требеништа – Ќафасан  доколку УНЕСКО не даде зелено светло за проектот бидејќи поминува низ заштитено подрачје, изјави премиерот Христијан Мицкоски, коментирајќи изјава на опозициски пратеник дека владата ја заборавила Струга и не планира да ја поврзе со автопатот од коридорот 8.

Тој појасни дека проблемот настанал бидејќи дел предвидената трасата е повлечена низ подрачје кое е периметар заштитен од УНЕСКО за што реагирала и организацијата. Притоа решението донесено од претходната влада на СДСМ и ДУИ не предвидува поврзување со општина Струга со овој автопат.

– Сега треба да одлучиме дали ќе ги почитуваме правилата или не и ќе го третираме ова како шведска маса, па ќе го почитуваме само тоа што ни одговара. Таква непринципиелна политика оваа влада нема да води – вели Мицкоски.

Мицкоски рече дека се бара решение на проблемот, а шефот на македонската дипломатија, Тимчо Муцунски кој е во Париз ќе разговара со највисокото раководството на УНЕСКО.

-Тие ќе дојдат во Македонија и доколку траекторија којашто ја предвиделе, сѐ уште е спорна за УНЕСКО ќе бараме нов начин. Граѓаните нема да останат неповрзани -рече Мицкоски.

Тој додаде дека во јуни ќе се знае што ќе се случува, но јасно стави до знаење дека поврзувањето на Струга со автопатот ќе се гради.

-Граѓаните од Струга треба да бидат спокојни, бидејќи оваа влада е влада на целата територија на државата и нема намера никого да остави заборавен, вклучително и граѓаните од Кичево, Вевчани, Дебарца, Охрид и сите општини долж коридорите 8 и 10д. Никој нема да биде заборавен – рече Мицкоски.

Мицкоски, посочи дека прашањето на поврзувањето со автопат на Македонија со Абанија треба да им се постави и на властите во Албанија.

-Таму автопатот нема да биде до Ќафасан, нема да биде ни експресен пат, туку ќе биде на 20-25 километри пред Ќафасан. Тоа е вистинското прашање рече Мицкоски.

Тој порача дека нема да дозволи етничка поларизација, обвинувајќи дека такви обиди доаѓаат од опозициските партии.

-Додека сум премиер, нема да дозволам етничка поларизација во државата- рече Мицкоски, додавајќи дека во Вевчани, Дебарца и Охрид мнозинството население е македонско.

Премиерот нагласи дека изградбата на коридори е клучна за економскиот раст

-Како Влада ни одговара да се гради, затоа што на тој начин се зголемува БДП и економијата – рече тој.

Мицкоски притоа рече дека претходната влада зад себе оставила само аванси и провизии, без реална реализација на проектите за коридори.

-Од реализацијата на коридорите 8 и 10Д, во три години беше реализиран само аванс и, најверојатно, наплатена провизија – рече тој.

Мицкоски обвини и, за како што рече, „некои лоши дејанија“ во врска со проектот автопат на Коридорите 8 и 10д.