ЌЕ ГИ ЛОВАТ ЛИДЕРИТЕ НА ХАМАС КАДЕ И ДА СЕ Израел ја проширува операцијата надвор од Газа
По ликвидацијата на портпаролот Абу Обеида, Израел најави дека ќе ги таргетира и лидерите на Хамас кои се наоѓаат надвор од Газа.
Израелската војска денеска соопшти дека нема да се ограничи само на Појасот Газа, туку ќе ги таргетира лидерите на палестинското милитантно движење Хамас и надвор од територијата, откако објави дека портпаролот на вооруженото крило на организацијата, Абу Обеида, е убиен.
– Во Појасот Газа вчера погодивме еден од високите лидери на Хамас, Абу Обеида. Тоа не е готово, повеќето лидери на Хамас се во странство и ние ќе ги погодиме и нив – изјави началникот на Генералштабот на израелската војска, Ејал Замир, во официјално соопштение.
Потврдата дојде и од министерот за одбрана, Израел Кац, кој преку платформата X порача дека портпаролот на Хамас е „елиминиран“ во израелски воздушен напад во Газа.
– Терористичкиот портпарол на Хамас, Абу Обеида, е елиминиран во Газа и им се придружи на другите елиминирани од оската на злото на Иран, Либан и Јемен. Сега е во длабочините на пеколот – рече Кац.
Од Хамас засега нема официјална реакција на веста за ликвидацијата на нивниот портпарол, кој важеше за едно од најпрепознатливите лица на вооруженото крило на движењето.