ДВАЈЦА ТИНЕЈЏЕРИ ОСУДЕНИ ЗА СВИРЕП МАСАКР НА ТРАНСРОДОВА ДЕВОЈКА Ја избоделе 28 пати со нож, ќе добијат доживотна затворска казна
Ова беше еден од највознемирувачките случаи со кои сме се занимавале. Планирањето, насилството и возраста на убијците се незамисливи - рече заменик-главниот обвинител Урсула Дојл.
Британски суд вчера осуди двајца тинејџери за убиство на Бриана Геј, 16-годишна трансродова девојка која беше избодена 28 пати во главата, вратот и грбот со ловечки нож.
Убијците, познати само како девојчето Икс и момчето Ипсилон, имале само 15 години кога ја намамиле Бриана во Линеар парк во селото Калчет, Англија, на 11 февруари годинава и ја масакрирале.
Главниот сведок изјави пред судот дека убијците на Бриана биле опседнати со насилство, тортура и смрт и дека подготвиле „список за убиства“ во кој е вклучена трансродовата Бриана и четири други деца, пишува Скај Њуз.
На поротниците им беа покажани илјадници СМС пораки и пораки на Ватсап разменети помеѓу девојката и момчето, кои сега имаат 16 години. Во пораките разговарале за нивните планови.
И момчето и девојчето тврделе дека тие не го извршиле убиството, а разговорите биле само мрачни фантазии.
Вчера поротата ги прогласи за виновни за убиство во судот во Манчестер по четири часа и 40 минути заседавање. Судијата Џастис Јип го одложи изрекувањето на пресудата.
– Ќе морам да изречам доживотна затворска казна. Она што треба да го одлучам е минималното време што ќе треба да го одлежите пред да поднесете барање за ослободување – рече судијата.
Таткото на Бриана, Питер Спунер, изјави дека е тажен, но и горд на својата ќерка чиј живот бил „брутално одземен“.
– Моето срце крвари секој ден за Бриана и ова никогаш нема да исчезне. Никогаш не престанав да ја сакам и никогаш нема. Знаев дека таа ќе биде ѕвезда и поддршката што ја доби од нејзините следбеници на Тикток го докажа тоа. Бев толку горд на она што таа можеше да го направи – рече тој.
– Ова беше еден од највознемирувачките случаи со кои сме се занимавале. Планирањето, насилството и возраста на убијците се незамисливи. Бриана Геј беше убиена во бесен и жесток напад и беше избодена 28 пати среде бел ден во јавен парк – рече заменик-главниот обвинител Урсула Дојл.
Еден од доказите беше рачно напишана белешка која беше пронајдена во спалната соба на девојката Икс. Обвинителите ја опишаа белешката како „план за убиство“.
Главниот инспектор на полицискиот детектив во Чешир, Мајк Еванс, рече дека и двајцата тинејџери „мислеле дека никогаш нема да бидат фатени“, но биле фатени поради нивната ароганција.
– Апсолутно е грозоморно тоа што го направија. Тоа беше најбруталниот, ладнокрвен, најсуров напад на ранливо и вознемирено дете – рече детективот.