ДУРИ 20.000 МОРНАРИ И 2.000 БРОДОВИ СЕ ЗАГЛАВЕНИ ВО ОРМУСКИОТ ТЕСНЕЦ Состојбата е на раб на хуманитарна криза

Тековната ситуација во Ормускиот Теснец се покажа како прилично голем предизвик за глобалната бродска индустрија, изјави Арсенио Домингез, генерален секретар на Меѓународната поморска организација (ИМО).

– Имаме 20.000 морнари заглавени во Ормускиот Теснец и околу 2.000 бродови кои не можат да испловат. Се разбира, колку подолго тие бродови остануваат таму, толку подолго екипажите продолжуваат да страдаат мемтално, од стрес и од замор, како и од намалување на сите резерви што им се потребни за бродовите да продолжат да функционираат – изјави Домингез за „Ал џезира“.

Шефот на ИМО рече дека осигурителните компании одбиваат да ги сносат трошоците за загубите. Повеќето или ги откажаа договорите или наплатуваат екстремно високи премии.

– Во моментов се избегнува хуманитарна криза на тие бродови благодарение на помошта што ја даваат земјите околу протокот – рече Домингез.

ИМО притиска за хуманитарен коридор, за да им се овозможи на бродовите да ја напуштат областа, додаде тој.

– Планот на американскиот претседател Доналд Трамп за придружба на бродовите низ протокот е едноставно неодржлив, бидејќи нема гаранции дека трговските бродови нема да бидат цел на напади и дека нема да бидат убиени невини морнари – рече генералниот секретар на Меѓународната поморска организација.

Иран го затвори теснецот и ги гаѓа бродовите што се обидуваат да поминат по нападите врз земјата од страна на САД и на Израел што почнаа на 28 февруари.