ДРАМАТИЧНО ПРЕДУПРЕДУВАЊЕ ОД ТРАМП ДО СИТЕ ПИЛОТИ, ДИЛЕРИ И ТРГОВЦИ СО ЛУЃЕ Воздушниот простор над и околу Венецуела е целосно затворен
До сите авиокомпании, пилоти, дилери со дрога и трговци со дрога, ве молиме сметајте го воздушниот простор над и околу Венецуела за целосно затворен, напиша американскиот претседател Доналд Трамп на својата социјална мрежа Трут соушл.
Американскиот претседател, Доналд Трамп, во услови на растечки конфликт со претседателот на Венецуела, Николас Мадуро, денеска објави драматично предупредување дека воздушниот простор над и околу Венецуела треба да се смета за „целосно затворен“.
„До сите авиокомпании, пилоти, дилери со дрога и трговци со дрога, ве молиме сметајте го воздушниот простор над и околу Венецуела за целосно затворен!“, напиша Трамп на својата социјална мрежа Трут соушл.
Администрацијата на Трамп, во својата борба против нарко-картелите, го засили притисокот врз Венецуела со распоредување на војската и на најголемиот носач на авиони во светот во Карибското Море.
Федералната администрација за воздухопловство на САД минатата недела ги предупреди главните авиокомпании во земјата за „потенцијално опасна ситуација“ при летање над Венецуела поради „влошувањето на безбедносната состојба и зголемената воена активност во или околу земјата“.
По ваквото американско предупредување, Венецуела ги одзеде оперативните права на шест големи меѓународни авиокомпании, кои ги суспендираа летовите до земјата
Ваквата реторика на Трамп сугерира дека САД веројатно ќе воведат строга зона на „забрането летање“ над Венецуела, што би можело да значи дека воздухопловните сили на САД ќе пресретнат и евентуално ќе соборат авиони што ја прекршуваат оваа забрана.
Директното обраќање до „дилерите на дрога и трговците со луѓе“ укажува дека примарната цел на оваа мерка е да се пресечат каналите за дрога и нелегалната миграција што често водат од Венецуела до Централна Америка и понатаму до границата со САД.
Венецуела е назначена како клучна транзитна точка за кокаин со децении, а администрацијата на Трамп очигледно преминува од санкции кон физичка блокада.
Останува нејасно како меѓународните авиокомпании ќе реагираат на ова, со оглед на тоа што воздушниот простор околу Венецуела е важен коридор за сообраќај во Јужна Америка, но пораката од Белата куќа е јасна: секој што се обидува да прелета над неа, го прави тоа на свој ризик.