ДОКУМЕНТАРЕЦ ЗА 30 ГОДИНИ УСТАВ Гледајте вечерва на МТВ1 од 20.45 часот
Филмот ја одбележува 30-годишнината од донесувањето на Уставот, изгласан во Собранието на 17 ноември 1991 година, преку приказ на изградбата, предизвиците и успесите на државата.
По повод одбележувањето на 30-годишнината од донесувањето на првиот македонски Устав, вечерва 17 ноември 2021 година, премиерно на МРТ1 со почеток од 20:45 часот ќе се емитува документарниот филм „30 години државност, Уставот-темел на иднината“.
Документарниот филм е во ко-продукција на Фондацијата Конрад Аденауер во Северна Македонија и на Македонската Радио Телевизија. Филмот ја одбележува 30-годишнината од донесувањето на Уставот, изгласан во Собранието на 17 ноември 1991 година, преку приказ на изградбата, предизвиците и успесите на државата.
„Кога на 17 ноември 1991 година беше донесен првиот македонски Устав, немаше човек на чие чело не му се читаше мисла поради неизвесноста што доаѓа, а срцето не му се стопли од радост што земјата за прв пат тргна по свој пат како самостојна и независна.“
Преку богатата видео архива за случува низ овие 30 години е прикажано влијанието на уставните промени во развојот на државата, граѓанското општество и созревањето на нацијата. Еминентните говорници меѓу кои и претседателот на Република Северна Македонија, Стево Пендаровски со личен осврт кон случувањата и уставните промени говорат за трансформацијата која е направена и за искушенијата низ времето.
„Првиот демократски Устав беше почеток на нешто ново. Посветеност на граѓаните на една земја за изградба на тогаш, а и сега, една несовршена држава. Како и сите други држави на светот. Со многу прозорци да се затворат и темели да се зацврстат. Секој член, и секој збор треба да бидат внимателно проверени, затоа што иднината на граѓаните зависи токму од нив.“
Документарниот филм е во ко-продукција на Фондацијата Конрад Аденауер (КАС) и МРТ, продуцент е официјалниот претставник на фондацијата Даниел Браун, продуцент од МРТ1 е Наталија Зафировска, одговорен уредник на МРТ1 Анета Андонова и уредник на информативна програма на МРТ1 е Стојан Трпчевски. Оригиналната идеја е на проф. д-р Александар Спасеновски и тимот на Институтот за општествени истражувања „МК91“, сценариото е на Дарко Чекеровски, режисер е Кирил Каракаш, директор на фотографија е Светислав Подлешанов, монтажер е Марко Џамбазоски.
Најавата за документарниот филм можете да ја погледнете на следниов линк.