Доделувањето на Оскар 2021 година се одложува заради коронавирусот?

Повикувајќи се на анонимен извор, магазинот „Вариети“ објави дека е веројатно оти церемонијата на доделување на Оскарите, која е закажана за 28 февруари на телевизијата Еј-Би-Си, да биде одложена.

Иако церемонијата за Оскарите беше закажана за 28 февруари 2021 година, се чини дека истата ќе биде одложена до понатамошно известување поради пандемијата на коронавирус. Kонечните планови не се конкретни во овој момент.

– Веројатно ќе бидат одложени – изјавил еден од изворите за „Вариети“, предупредувајќи дека деталите, вклучително и потенцијалните нови датуми, сè уште не се целосно разгледани или формално предложени.

Во исто време, друг извор тврди дека датумот на Еј-Би-Си е моментално непроменет.

Кога во април беа објавени новите привремени измени во правилата за освојување на Оскарите, поради пандемијата на коронавирус, претседателот на Академијата, Дејвид Рубин, рече дека е рано да се знае како може преносот на Оскарите во 2021 година да се промени поради пандемијата.

– Сѐ уште не е можно да се знае со сигурност. Знаеме дека сакаме да ги славиме филмските достигнувања, но не знаеме во каква форма ќе биде -рекол тој во таа пригода.

Според вообичаените правила – филмот мора да има седумдневна проекција во кината во Лос Ангелес, со цел да се квалификува за Оскар. Сепак, за оваа година филмовите кои се дигитално објавени може да се квалификуваат ако студиото првично планирало театарска проекција.