ДОБРИ СОСЕДИ, ПРИЈАТЕЛИ И ПАРТНЕРИ Си Џинпинг го пречека Путин со највисоки државни и воени почести

Кинескиот лидер Си Џинпинг во четвртокот го пречека рускиот претседател Владимир Путин со серенада од воениот оркестар и повеќекратен воен поздрави пред Големата сала на народот во Пекинг, најавувајќи го почетокот на дводневната државна посета чија цел е да се нагласи блискиот однос меѓу двајцата лидери.

Според Си-Ен-Ен оваа посета е особено симболична за Путин бидејќи ова е прво патување во странство откако минатата недела тој влезе во новиот претседателски мандат. Посетата е и знак за поддршката на Си Џинпинг за Путин и нов знак за продлабочување на врските.

За време на разговорите во четвртокот наутро, кинескиот претседател рече дека кинеско-руските односи „го издржале тестот на променливиот меѓународен пејзаж“ и треба да бидат „негувани“ од двете страни, се вели во соопштението на кинеското Министерство за надворешни работи.

– Кина е подготвена да соработува со Русија за да останеме добри соседи, добри пријатели и партнери кои си веруваат еден на друг, да продолжиме да го зајакнуваме трајното пријателство меѓу двата народи и заеднички да продолжиме со националниот развој и ревитализација, да продолжиме да поддржуваме еднаквост и правдата во светот – изјави Си Џинпинг.

Путин ја поздрави „практичната соработка“ на двете земји, укажувајќи на нивната рекордна билатерална трговија минатата година и истакнатоста на Кина како економски партнер на Русија, пишува рускиот државен медиум ТАСС. Рускиот претседател рече дека енергетиката, индустријата и земјоделството се меѓу приоритетите на соработка меѓу двете пријателски земји.

Пречекот на Путин на црвениот тепих во Пекинг доаѓа еден ден откако украинскиот претседател Володимир Зеленски преку неговата канцеларија објави дека ќе ги прекине сите претстојни меѓународни посети додека неговите војници се бранат од новата руска офанзива во североисточниот регион Харков.

Кси го пречека Путин под зголемен притисок од САД и од Европа да се осигура дека растечкиот извоз на Кина во Русија од почетокот на војната не ги поддржува воените напори на Кремљ.

Си-Ен-Ен објави дека се очекува двајцата лидери да разменат мислења за Украина, како и за конфликтот во Газа, како и да разговараат за проширување на трговските, безбедносните и енергетските врски.

Кинескиот лидер Си Џинпинг изјави денеска дека тој и рускиот колега Владимир Путин се согласиле за потребата од „политичко решение“ за војната во Украина, по разговорите меѓу двајцата претседатели во Пекинг.

– Двете страни се согласуваат дека политичкото решение за украинската криза е правилна насока – изјави Си за медиумите заедно со Путин на заедничката прес-конференција што ја емитуваше Руската телевизија.

Пред самото патување, Путин, во интервју за кинескиот државен медиум Ксинхуа, го поздрави „невиденото ниво на стратешко партнерство“ меѓу двете земји.

Тој изјави дека двете земји имаат за цел „да ја зајакнат надворешната политичка координација“ и да ја продлабочат соработката во „индустријата и високата технологија, просторот и мирновременската употреба на нуклеарната енергија, вештачката интелигенција, обновливите извори на енергија и другите иновативни сектори“.

Се очекува Си и Путин да потпишат и серија билатерални договори, соопшти Кремљ. Тие ќе прослават и 75 години дипломатски односи на „гала забава“, јавуваат кинеските државни медиуми.