ДОБРА ВЕСТ ЗА НАШИТЕ ИСЕЛЕНИЦИ Николоски најави нова авиолинија од македонските аеродроми
Министерот за транспорт, засега не може да каже кон која земја ќе се воведе новата авиолинија.
Министерот за транспорт Александар Николоски денеска најави деветта авиолинија во земјава. Како што рече на меѓународната конференција за бизнис дипломатија, не може да каже јавно за што станува збор, но „дијаспората ќе биде многу среќна кога ќе слушне“.
Очекувањата на Николоски се дека пред нас е стабилна и исклучително успешна година со рекорден број странски инвестиции, како и дека земјава ќе биде „број еден во регионот“.
-Утрово имам потврда за деветта авиолинија, но уште не можам да ја кажам јавно. Мислам дека нашата дијаспора ќе биде многу среќна кога ќе ја слушне. Како Влада во овие шест и пол месеци имаме девет нови авионски линии, а можам да најавам и почеток на реконструкција на терминалната зграда на охридскиот аеродром – рече Николоски.
Во обраќањето на конференцијата, тој се осврна и на останатите инфраструктурни проекти. Очекува, како што рече, до почетокот на летната сезона да бидат пушетни 40 километри од автопатот Охрид – Кичево, како и „многу убави вести во следниот период“ за брзата пруга на Коридорот 10 која треба да биде главниот крвоток на Македонија.
-Пред нас имаме стабилна година и мислам дека ќе биде исклучително успешна. Доколку во нашиот најголем трговски партнер, Германија, барем се стабилизира состојбата ако не оди нагоре, во тој случај мислам дека ќе бидеме број еден во регионот. Тука, секако, најзначаен е бизнис секторот од кој очекуваме сериозна поддршка. Очекуваме и рекорден број странски инвестиции, независно дали од постојните или од нови. Досега отворивме 42 километра експресни патишта. Во следните три месеци очекувам отворање на уште 10 километри, а до крајот на годината и да заврши целосното решение од главниот град до Прилеп или автопат или експресен пат. Моментно интензивно работиме на преку 150 километри автопатишта во државата, се гради Прилеп – Битола, Охрид – Кичево, популарната Стража, има тендер за Скопје – Блаце за конечно да се заврши и тој автопат, кон Косово – рече министерот.