„ДОБИВ ПОВЕЌЕ ПОТПИСИ ЗА КАНДИДАТУРАТА ОТКОЛКУ ШТО ИМАМЕ ЧЛЕНОВИ“ Димитриевски вели дека ќе става вето на сѐ што не е во интерес на граѓаните

Караванот на претседателскиот кандидат од Движењето ЗНАМ – За наша Македонија, Максим Димитриевски и денеска беше во охридскиот регион.

– Јас како кандидат за претседател  на државата којшто сака да го даде својот максимум за наша Македонија, заедно со членовите и претставниците од Движењето ЗНАМ вчера и денеска поминавме многу домови, се сретнавме со многу граѓани од Охрид и регионот. Проблемите се секаде исти во Македонија – рече Димитриевски во обраќањето до медиумите.

Тој рече дека во неговата програма Манифест за Македонија, нуди голем број решенија.

– И ќе ги реализираме, нема да останат само зборови на хартија. Едно од најбитните е дека Македонија ќе добие претседател од граѓаните, којшто нема да биде во функција на политичките субјекти, туку првенствено ќе ги штити граѓанските интереси. Со тоа што никогаш нема да дозволам да потпишам закон или каков било друг акт којшто е спротивен на волјата на граѓаните и секогаш тој ќе добие вето и ќе биде вратен на повторно разгледување пред законодавниот дом – рече Димитриевски и додаде дека тоа што граѓаните ќе дадат поддршка на еден ваков концепт, ќе значи дека ќе добијат претседател на државата од своите редови, човек којшто излегува од самите граѓани, човек кој не должи никому, ниту на еден политички субјект.

Тој рече дека Движењето ЗНАМ – За наша Македонија е мал политички субјект кој добил повеќе потписи за подршката за неговата кандидатура, отколку што имал членови во тој момент и верува дека граѓаните ќе ја дадат нивната поддршка и на денот на изборите.

Прашан за што најмногу се жалат граѓаните, Димитриевски рече:

– Најголемите проблеми кои ги наведуват се владеењето на правото, неказнивоста, селективната правда, нефункционалната држава и финансиско-социјалната состојба во којашто е државата, а знааеме дека таа е многу лоша. Недостиг на уреден систем кадешто можат институционално да ги решаваат проблемите. На средбите со капетаните коишто се тука и даваат услуги на туристите рекоа дека, на пример, нема марина каде што може да се снабдат со основната работа на прописен начин, а тоа е горивото. Со години се ветува дека ќе се реши, но реално тие децениски проблеми не се решаваат. Сметам дека нивото на организацијата во делот на туризмот треба да се подобри – потенцира Димитриевски.

Неговиот караван денеска ќе ги посети населенните места во Дебарца. Вчера Димитриевски имаше повеќе средби со граѓаните на Вевчани и на Струга, а се обрати и пред граѓаните на Охрид.