ДИВИДЕНДАТА ПО АКЦИЈА Е ЗА 33% ПОГОЛЕМА ОД ЛАНИ Продолжува трендот на силен раст на Македонски Телеком
Македонски Телеком го продолжи трендот на раст и испорача силни финансиски резултати во првото полугодие на 2024 година. Успешното работење се должи на стратешките инвестиции во развој на мрежата и нови технологии, коишто доведоа до супериорни услуги и корисничко искуство.
Нето добивката е во пораст од 7,4 проценти, а приходите од продажбата се зголемени за 2,5 проценти во споредба со истиот период од претходната година и изнесуваат 5.965.000.000 денари. Оперативната добивка пред камати, оданочување и амортизација (EBITDA) е благо намалена за 0,4 проценти споредено со минатата година.
Супериорно корисничко искуство и зголемување на базата на корисници
Продолжува трендот на зголемување на бројот на корисници во сите сегменти. Бројот на корисници на широкопојасен интернет е зголемен за 3,3 проценти и изнесува 213.000, а вкупниот број на интернет пристапи порасна за 3,3 проценти. Базата на корисници се зголеми и во мобилните комуникации и достигна 1,3 милиони. Во фиксната телефонија, компанијата останува на водечката позиција со 230.000 корисници.
Со првата дигитална програма за наградување и поволности за корисниците – Magenta Moments, достигнати се 190.277 корисници. Компанијата останува број 1 во Македонија според TRI*M индексот за мерење на задоволството на корисниците, што е резултат на нејзината посветеност да обезбеди врвно корисничко искуство и многу повеќе од комуникациски услуги за комерцијалните и за деловните корисници.
Лидерство на ТВ пазарот со новата телевизија MagentaTV
Во однос на ТВ пазарот, ја зацрвсти лидерската позиција со удел од 35% од вкупниот ТВ пазар. Новата дигитална телевизија – MagentaTV станува сè попопуларна поради напредните карактеристики и иновативното ТВ доживување коешто им го нуди на корисниците. На крајот на првото полугодие од годината бројот на ТВ корисници се зголеми за 3 проценти, со што базата на корисници достигна 153,2 илјади.
Инвестиции и развој на најдобрата мрежа
Постојаните вложувања во мрежната инфраструктура го зајакнуваат статусот на најдобра мрежа. Остануваат лидери во покриеност со оптика доследни на нивниот фокус на ширењето и инвестициите во оптичката мрежа и денес имаат 330.000 пристапи до оптика, што е за 13,9% повеќе споредено со истиот период од претходната година. Нивната 5G мрежа продолжува да се шири и е достапна за 92% од населението во Македонија со гигабитни брзини во речиси сите градови.
Вкупните капитални инвестиции (CAPEX) на крајот од првите шест месеци од 2024 година изнесуваат 721 милион денари. Компанијата продолжува да ја шири инфраструктурата на целата територија со најновите технологии за да ги поврзе сите корисници со најдобрите услуги.
Зголемување на дивидендата и дивидендниот принос
Успешните резултати на компанијата доведуваат и до повисока дивиденда за акционерите. Бруто износот на дивидендата по акција за 2023 година е зголемен за дури 33% во споредба со исплатената дивиденда по акција за 2022 година. Исто така, зголемен е и дивидендниот принос од акциите за 26% во однос на минатата година и изнесува 6,7%. Цената по акција од почетокот на 2024 година до крајот на првите шест месеци е зголемена за 6,9%. Ова е потврда дека стратегијана компанијата и технолошкото визионерство одат во вистинската насока и се препознаени од корисниците.