ДИСКОТЕКАТА РАБОТЕЛА СО ФАЛСИФИКУВАНА ЛИЦЕНЦА?! Била издадена во времето кога министер бил Крешник Бектеши

Дискотеката „Пулс“ во Кочани што се запали ноќеска и во која загинаа 59 млади, а 155 беа повредени, работела со фалсификувана лиценца, дознава Плусинфо.

Фалсификуваната лиценца била издадена во времето кога министер за економија бил Крешник Бектеши од ДУИ.

На фалсификуваната лиценца потпишана била Размена Чекиќ Дуровиќ, бивш државен секретар на Министерството за економија во времето на Бектеши.

Според информации на ТВ21 дискотеката во моментов нема важечка лиценца, односно последната била издадена на 13 март 2023 година и истата имала важност една година. Дискотеката била во приватна сопственост и менувала сопственици во текот на изминатите години. ТВ21 дознава дека сегашниот сопственик цело време бил во сопственичката структура на ноќниот клуб.

Објектот во кој била сместена дискотеката е изграден во 1999 година.

– Нашите двајца инспектори се на лице место и утврдуваат дали се запазени законските обврски при изградбата на овој објект. Легализиран е во 2005 година. Дали имал пренамена, тоа ќе го утврдат нашите инспектори заедно со јавниот обвинител – рекоа од Дирекцијата за заштита и спасување за ТВ 24.

Прашање е и дали за објектот е направен елаборат за противпожарна безбедност.

Според првите информации, пожарот настанал поради употреба на пиротехнички средства за време на настапот на групата ДНК.