ДИРЕКТНО УЧЕСТВУВАЛ ВО СЛУЧАЈОТ „ОНИШЧЕНКО“? Ковачки тврди дека новиот директор на Агенцијата за национална безбедност не е нов човек
Токму Виктор Димовски и Зарко Милошевски се најодговорни за негирањето на правото за пристап до класифицирани информации на лица кои се неподобни за СДС и ДУИ и во тој оддел под нивно раководство се креираат и фабрикуваат лажни вести кои се испраќаат во НАТО, обвинува Драган Ковачки од ВМРО-ДПМНЕ.
Продолжува партизацијата, неспособноста и аматеризмот во АНБ. Изборот на Зарко Милошевски за директор на АНБ значи дека ништо не се менува, туку како што кажува и Али Ахмети, ќе биде „како и до сега”, реагираше Драган Ковачки од ВМРО-ДПМНЕ откако Владата денеска го назначи Милошевски за директор на Агенцијата за национална безбедност.
„Милошевски не е нов човек. Тој му бил помошник и е кадар на Виктор Димовски и на Миле Зечевиќ, а со тоа и на српската врска. Досега ја извршувал функцијата помошник директор на Одделот за безбедносни проверки и НАТО во АНБ, а на таа позиција е поставен со потпис на досегашниот контроверзен директор – Виктор Димовски. Зарко Милошевски како помошник директор за безбедносни проверки директно учествувал во случајот Онишченко. Тој е една од причините поради која Онишченко добива македонско државјанство, но очигледно дека тоа не значи ништо за тие што го поставиле. Милошевски е помошник директор во АНБ и кога над 200 криминалци од регионот и светот добиваат македонски патни исправи. Милошевски е резултат и дел од целата неспособност на СДС во безбедносниот сектор во изминативе 7 години. Учествувал на највисоко ниво во безбедносните настани и пропусти во изминативе 7 години“, напиша Ковачки на Фејсбук.
Токму Виктор Димовски и Зарко Милошевски, додава тој, се најодговорни за негирањето на правото за пристап до класифицирани информации на лица кои се неподобни за СДС и ДУИ и во тој оддел под нивно раководство се креираат и фабрикуваат лажни вести кои се испраќаат во НАТО.
„Тој не е кадар кој може да донесе промени. Напротив, сѐ ќе биде како до сега, а СДС со вакви партиски решенија продолжува да ја срами Македонија“, пишува Ковачки.