Дежурни во училиштата ќе издаваат потврди на родителите

Од денеска не работат градинките, основните и средните училишта и факултетите во целата земја поради опасноста од ширење на коронавирусот, но треба да има дежурни лица за овие воспитни и образовни институции за издавање на потврди на родителите, дезинфекција на просториите и друго.

Една од мерките што вчера ги донесе Владата е дека еден од родителите на деца до 10 години може да користи отсуство поради прекинот на наставата во наредните 14 дена, а тоа може и да се подели па по 7 дена да земе таткото, а потоа мајката. За децата со посебни потреби отсуството важи и за постарите од 10 години.

Во врска со тоа кој ќе ги издава потврдите во основните училишта, министерот за образование, Арбор Адеми, за Плусинфо денеска појасни:

– Заради потребата на родителите треба да се обезбеди сервисна услуга. Дежурство мора да има во училиштата и за потврдите, но и за дезинфекција, на пример, а вработените не треба да одат на работа. Во сите училишта мора да има дежурства за родителите да знаат кому да се обратат. И факултетите во летниот период не работат, но доколку на студент му треба потврда, службите ја издаваат – вели Адеми.

Отсуствата од работа ќе се докажуваат со потврди кои ќе ги издаваат градинките и основните училишта, на име на родителот корисник на мерката за ослободување од работа поради грижа за дете со навршена возраст до 10 години, во кои ќе биде наведен и временскиот период за кој се однесува.

Од Владата вчера попладне  брифираа дека во овој период ќе работат само вработените во администрација на високообразовните и научните институции.