ДЕПОНИИТЕ ЧИСТИ, НО ТРУПЦИТЕ ЗИМАВА ПАК ЌЕ ГОРАТ Така е кога струјата поскапува

Поскапената струја и енергетската криза во која се наоѓа Македонија ќе направат граѓаните и зимава за огрев да користат дрва, велат од Град Скопје за загадувањето на воздухот кое нè очекува, а за кое Градот веќе објави 19 итни мерки, меѓу кои и бесплатни автобуси во јавниот и приватниот превоз.

„По најавите за драстично зголемување на цената на електричната енергија, дел од граѓаните најавуваат дека за огрев ќе користат дрва, што дополнително негативно ќе се одрази на загадувањето на воздухот“, нагласуваат од Град Скопје.

Во однос на мерките кои се преземаат во моментот,  од Градот велат дека уште во првите денови од мандатот, новата градската администрација почнала интензивно да ги чисти сите диви депонии кои биле детектирани на територијата на градот и досега се исчистени над 120 депонии.

„На дел од нив се планирани нови зелени површини, а меѓу нив во Ново Лисиче, во Ново Село и на многу други места“, стои во соопштението.

Како мерка против загадувањето се наведува и зголемениот и неселективен инспекциски надзор и воспоставување на системски решенија, со што секое физичко или правно лице кое ја загадува околината и со тоа директно влијае врз загадување на воздухот, ќе биде казнето со високи глоби.

„За прв пат неселективно се изрекуваат драконски казни за загрозување на животот и здравјето на граѓаните, а една беше изречена неодамна во износ од 88 илјади евра“, објаснуваат градските власти.

Од таму посочуваат и дека планот на Град Скопје е преку модернизација на јавниот превоз, директно да се влијае и да се подобри квалитетот на воздухот.

„Покрај тоа планирани се нови велосипедски патеки, субвенции за купување на велосипеди и електрични тротинети, со што ќе се мотивираат граѓаните да користат алтернативен превоз. Град Скопје во план има и изградба на пет мега паркови, со што ќе се зголеми зеленилото во градот“, стои во соопштението.