ДАНЕЛА АРСОВСКА НЕ ДАЛА ПАРИ ЗА ЧИСТЕЊЕ НА МАРКОВА РЕКА Ѓорѓиевски смирува дека нема опасност за жителите на Батинци

Веднаш по добиената информација за излевање на Маркова Река поради обилните врнежи во општина Студеничани, од гостување на телевизија се упатив на најкритичните места да помогнеме на нашите соседи, објави градоначалникот на Кисела Вода, Орце Ѓоргиевски, по излевањето на Маркова Река во Батинци.

„Сакам да нагласам дека во постојана комуникација сме со премиерот Христијан Мицкоски кој веднаш се понуди доколку е потребно да ги мобилизира сите расположливи ресурси за што јас, а и сите жители на Студеничани му се заблагодаруваме. Механизацијата е на терен и нема опасност по населението, силно се работи на враќање на реката во своето корито.
Со колегата градоначалник на Студеничани, Азем Садику сме тука и будно ќе ја следиме ситуацијата да биде под контрола, во текот на целата ноќ. Спремни сме со сите расположливи сили да помогнеме. Во постојана комуникација сме и со колегата Дејан Митевски од Аеродром, така што и тој е подготвен да помогне во случај да тоа е потребно. Она што вистински загрижува е што сите институции не си ја вршат својата работа – со акцент на градот Скопје од кој лично имаме побарано во неколку наврати да се среди речното корито но, од страна на градоначалничката во заминување ни беше одговорено дека немаат предвидено средства за тоа. Замислете…“, објави Ѓоргиевски.

Временските непогоди не можеме да ги спречиме, но можеме да делуваме да нема големи последици, додаде тој.

„Материјалното ќе го поправиме заеднички – Бог нека нè чува сите, тоа е најважно!“, напиша Ѓоргиевски.