ДАЛИ ЗЕМАТЕ НАЕДНАШ ПОЛНА РАКА СУПЛЕМЕНТИ? Пет комбинации на додатоци кои прават повеќе штета отколку корист

Земањето витамински и минерални додатоци наеднаш, наутро или во друго време од денот, се чини како практичен и едноставен начин да направите нешто корисно за вашето здравје и да не заборавите или прескокнете ниту еден од вашите додатоци во исхраната во текот на денот.

Но, колку и да е практичен таков пристап „сè одеднаш“, лекарите и нутриционистите сметаат дека тој не мора да е нужно и добар.

Некои витамини и минерали влијаат едни на други, или намалувајќи ја нивната ефикасност или предизвикувајќи непријатни несакани ефекти како што се мачнини, дијареја и запек. За да го извлечете максимумот од вашите додатоци во исхраната (и парите што ги трошите на нив), важно е да знаете кои комбинации да ги избегнувате.

– Повеќето луѓе не се свесни колку е важен тајмингот кога станува збор за додатоци во исхраната. Некои подобро се апсорбираат со храна, додека други подобро се апсорбираат на празен стомак. Некои комбинации може да бидат во интеракција едни со други или со лековите што ги земате – вели нутриционистката Ејми Маргулис.

– Со други зборови, мешањето на одредени додатоци всушност може да има спротивен ефект од она што го сакате, а тоа е подобрување на вашето здравје. Во екстремни случаи, може да се појават долгорочни нутритивни недостатоци и токсичност од витамини – предупредува лекарката по семејна медицина д-р Брина Конор.

Ова не значи дека треба да се воздржите од земање додатоци во исхраната, туку само дека треба да внимавате да не ги земате овие пет комбинации на додатоци заедно. На овој начин, ќе го заштитите здравјето на цревата и ќе ги постигнете придобивките за кои сте ги купиле овие суплементи.

Не мешајте: железо и калциум

Калциумот влијае на апсорпцијата на железо во цревата, што ја прави оваа комбинација лоша. Доколку ви недостасуваат двата минерали, можете да ги земате, но со доволно време помеѓу нив.

Како да се земаат:

– Земајте железо најмалку два часа пред или по земањето додатоци на калциум или консумирање храна богата со калциум, како што се млечни производи, зелен лиснат зеленчук или конзервирана риба со коски. Калциумот најдобро се апсорбира кога се зема во мали дози (500 мг или помалку) распоредени во текот на денот, вели докторот по интегративна медицина Ламис Хендман. Можете да земате калциум цитрат со или без храна, но калциум карбонатот најдобро е да се зема со храна бидејќи за оптимална апсорпција е потребна желудочна киселина.

Не мешајте: железо и цинк

Слично на калциумот, железото не се согласува добро ниту со цинкот. Истражувањата покажале дека тие „се натпреваруваат“ за истите патишта на апсорпција во цревата.

– Ако земате висока доза на додатоци на железо и цинк истовремено, особено на празен стомак, постои голема веројатност вашето тело да не го апсорбира цинкот толку добро – вели Маргулис.

Како да се земаат:

– За оптимална апсорпција, генерално е најдобро да се зема железо со храна (само не со храна богата со калциум) и одделно од цинк – советува Маргулис.

Со оглед на тоа што одредени видови храна можат да влијаат на апсорпцијата на цинк, повеќето лекари препорачуваат да се зема на празен стомак. Меѓутоа, ако цинкот ви предизвикува лошо варење, сосема е во ред да го земате со мал залак храна. Само не го земајте со храна богата со калциум, железо или растителни влакна, вели Маргулис.

Не мешајте: бакар и цинк

Ако земате додаток на цинк, треба да бидете свесни дека високите дози на цинк можат да ја намалат апсорпцијата на бакар. Ова може да доведе до потенцијален недостаток на бакар со текот на времето. Јадењето храна богата со бакар, како што се морска храна, семиња, јаткасти плодови и органско месо, може да го спречи овој ефект, но сепак би било мудро редовно да ги проверувате нивоата на бакар.

Како да се земаат

Ако треба да земате и цинк и бакар, земајте ги со растојание од најмалку два часа. И двата додатоци може да се земаат на празен стомак.

– Можете да земате цинк наутро пред појадок, а бакар пред ручек или вечера, под услов да не консумирате храна неколку часа пред да го земете додатокот – вели Маргулис.

Не мешајте: калциум и магнезиум

– Калциумот и магнезиумот исто така се натпреваруваат за апсорпција во гастроинтестиналниот систем, што значи дека земањето на двата додатоци истовремено во големи дози може да предизвика проблеми со желудникот, како што се надуеност и/или дијареја – вели д-р Конор.

Како да се земаат

Земајте калциум и магнезиум одделно, со растојание од најмалку два часа. Калциумот е погоден за земање со појадокот, бидејќи калциум карбонатот треба да се зема со храна, додека релаксирачките ефекти на магнезиумот се идеални за вечерните часови, пред спиење.

Не мешајте: витамин Б12 и витамин Ц

Со оглед на тоа што витаминот Ц создава кисела средина, студиите покажале дека големите дози потенцијално можат да го разградат витаминот Б12 пред тој воопшто да може да делува.

Како да се земаат

Д-р Конор препорачува да се земаат по азбучен ред: прво витамин Б12, а витамин Ц дури по два или повеќе часа. Можете да го комбинирате витаминот Б12 со лесен појадок, иако е сосема во ред да го земате на празен стомак.

Идеални комбинации

Постојат и бројни комплементарни витамини и минерали кои ги подобруваат ефектите еден на друг. Иако експертите нагласуваат дека вашите нутритивни потреби треба да ги задоволите првенствено преку храна, доколку одлучите да земате додатоци во исхраната, ова се оние што ќе ви бидат од голема корист:

Витамин Ц и железо

Витаминот Ц ја подобрува апсорпцијата на железо, особено од растителни извори, како што се грав и леќа.

– Оваа комбинација е одлична за спречување на недостаток на железо, а воедно и за одржување на високо ниво на енергија – вели Маргулис.

Витамин Д и витамин К12

– Овие витамини дејствуваат синергистички за да ги оптимизираат ефектите на калциумот и се одлична комбинација за одржување на здравјето на коските – вели д-р Хамдан.

Витамин А и железо

Истражувањата покажале дека овој витамин и минерал се помоќни кога се заедно, особено кај луѓе кои имаат анемија.

А што е со мултивитамините?

Со оглед на тоа што некои витамини и минерали се спречуваат едни со други во апсорпцијата, логично е да се прашаме колку се безбедни и препорачливи мултивитаминските и мултиминералните додатоци.

– Мултивитаминско-минералните додатоци имаат специјални формули со помали, избалансирани дози кои не влијаат едни на други – објаснува Маргулис.