ДАЛИ „СРПСКИОТ СВЕТ“ РАБОТИ НА ДЕСТАБИЛИЗАЦИЈА НА МАКЕДОНИЈА? Некој си игра со оган, граѓаните да не паѓаат на провокации
Алијанса на Албанците, крилото на Зијадин Села прашува дали т.н. „српски свет“, заедно со нивните слуги во Македонија сакаат слична дестабилизација, како што се обидоа пред неколку денови во Косово и ја повикува меѓународната заедница директно да интервенира, за да се спречи оваа „кампања која ја загрозува не само земјата, туку и целиот регион“.
Граѓаните да бидат внимателни и да не станат плен на провокации и сценарија, а Владата и надлежните институции итно да дејствуваат да ги спречат, соопшти опозициската Алијанса на Албанците. Крилото под раководство на Зијадин Села, ја повика Алијанса на Албанците по раководство на Арбен Таравари да ја напушти власта за заедно да ја спречат, како што се вели во соопштението, опасната кампања.
„Вербалните закани, говорот на омраза и антиалбанската реторика поттикнати и од владини политички експоненти и од националистички групи, почнаа да се реализираат на дело со напади врз Албанците и нивниот имот, како што беше случајот синоќа во Куманово, каде беа запалени канцеларија и три возила сопственост на Албанците“, соопшти партијата.
За жал, се додава во соопштението, како и во минатото така и сега, Куманово повторно е избрано за арена за опасни сценарија и за следен удар врз Албанците.
„По последователни настани, изјави започнати во текот на кампањата, владини одлуки, инциденти за време на празникот 28 ноември и сега со палењето на имотот на Албанци во Куманово, јавно прашуваме кој стои зад целата оваа кампања и кој си игра со оган? Можеби таканаречениот „српски свет“, заедно со нивните слуги во Северна Македонија сакаат слична дестабилизација, како што се обидоа пред неколку денови во Косово. Ги повикуваме албанските партии во Владата да стават крај на нивната авантура за која од почеток ги предупредувавме и да не станат марионети на нивните партнери кои отворено ги искажаа своите планови против Албанците, туку да се вратат кај народот, за заедно да ја запреме оваа опасна кампања“, се вели во соопштението.
Алијансата за Албанците, се додава, ја повикува меѓународната заедница директно да интервенира за да се спречат ваквите настани и оваа „кампања која ја загрозува не само земјата, туку и целиот регион“.