ДА СЕ ОБЕДИНИМЕ ВО БОРБА ПРОТИВ КРИМИНАЛОТ И КОРУПЦИЈАТА На 24 април сите заеднички да ја поддржиме Гордана Силјановска Давкова, повика Сајкоски

Изминатите 7 години видовме корупција, криминал, се она што треба да биде спротивно од она што треба да го работи една влада. Затоа ве повикувам да се обединиме во борба против криминалот и корупцијата, истакна генералниот секретар на ВМРО-ДПМНЕ и носител на опратеничка листа во ИЕ 5, Ѓорѓија Сајкоски на денешниот митинг на ВМРО-ДПМНЕ во Долнени.

Сајкоски додаде дека Пендаровски само зборува против корупција и криминал, а ништо не направи за да ја спречи корупцијата и криминалот во нашата држава.

-Пендаровски зборува за економија, а денес имаме најзадолжена држава во регионот бидејќи нашата држава Македонија сите влади до 2016 година ја задолжиле околу 4,5 милијарди евра, а оваа влада за само 6 и пол години ја задолжи 4 милијарди евра и ние треба да ја казниме таа влада и претседател кој лажно се претставува – посочи Сајкоски.

Генералниот секретар на ВМРО-ДПМНЕ упати повик до граѓаните да застанат под знамето на Македонија и да дадат поддршка за Гордана Силјановска Давкова на претседателските избори.

– Ве повикувам заедно да застанеме под знамето на Македонија затоа што е потребно најмногу единството во овој период. Да ја поддржиме нашата кандидатка Гордана Силјановска Давкова бидејќи ние нудиме различен концепт од оној што е досега. Ние нудиме универзитетски професор, лик кој е профилиран во парламентот, лик кој изминатите години многу помогна за нашата држава. Кандидатка за претседател која знае да не претставува надвор, меѓутоа знае и да нè почитува и сите тука во нашата држава – вели Сајкоски.

Тој посочи дека на 24 април треба што помасовно да се излезе на гласање.

– На 24 април сите заеднички да излеземе што помасовно затоа што масовноста ќе ни треба, затоа што така ќе го покажеме единството и само така може оваа власт да ја направиме да биде најпоразена власт што досега постоела во Република Македонија – дециден е Сајкоски.