ДА БИДЕМЕ ГЛАСНИ ВО НАШИТЕ СТАВОВИ, ДА ИМАМЕ ПЛАН И ДА БИДЕМЕ ИСТРАЈНИ Илинден е повик за сите нас, порача премиерот Мицкоски
Борбата за иднина, борбата за Македонија во рацете на народот е нашата обврска. Ова е борбата на нашата генерација со која оставаме трага низ времето, цврсто верувајќи во нејзината исправност и големина, истакна премиерот Христијан Мицкоски.
Илинден не е само историска приказна или историски сон, туку пред сѐ е историска вистина. Илинден е нашиот најсилен повик за акција и единство денес. Вака премиерот Христијан Мицкоски пишува во честитката по повод Денот на Републиката.ѐ
„Илинден е повик за сите нас – да продолжиме да се бориме за нашите права, за нашата култура, за нашата слобода. Забележете ги внимателно зборовите од Крушевскиот манифест кој освен тоа што ја слави слободарската идеја, неговата најголема порака е повикот за единство. Врз тоа единство се градеше Крушевската република, и во име на тоа единство сите го кренаа бајракот на слободата. Вистинското прашање и дилема денес е дали тоа единство постои во состојба кога борбата мора да трае, за да имаме победа. Борбата трае – потсетувајќи нѐ дека борбата за слобода, правда и за подобра иднина бара истрајност, храброст и единство. Од нив треба да научиме како се добиваат големите победи, бидејќи битка може да изгубите, но важно е да победите во својата конечна цел“, наведува премиерот.
Истрајност, внимателност и пред сѐ добар план да се дојде до вистинската цел, порачува Мицкоски.
„Тоа е стратегијата што треба и ние да ја користиме, да бидеме гласни во нашите ставови, да имаме план и да бидеме истрајни. Борбата не е завршена! Борбата продолжува! Борбата ја водиме со секој наш изговорен збор, во секоја наша направена акција, со секоја наша мечта за подобра иднина. Борбата за иднина, борбата за Македонија во рацете на народот е нашата обврска. Ова е борбата на нашата генерација со која оставаме трага низ времето, цврсто верувајќи во нејзината исправност и големина“, порача премиерот Мицкоски.