ДА ЈА „ПРЕГАЗИМЕ“ БУГАРИЈА НА ПАМЕТЕН НАЧИН Иницијативата на Ѓорчев за формирање регистар ги загреа партиите во Македонија
Не само што ни е крајно неопходен еден таков регистар којшто ќе ги лови сите бугарски зулуми, туку потребна ни е и офанзива во насока на тоа да биде уважена барем една од сите 14 пресуди во судот во Стразбур, вели за Плусинфо пратеникот од редовите на ВМРО-ДПМНЕ, Бојан Стојаноски.
Ако сме одлучиле да ги штитиме националните интереси, тоа не значи дека покренуваме офанзивен чекор против Бугарија, туку напротив, тоа значи дека ја зајакнуваме дефанзивата и се обидуваме на секаков начин да се заштитиме од агресорот. Затоа сметаме дека предлогот на екс-амбасадорот Марјан Ѓорчев да се формира регистер кој ќе го лови бугарскиот говор на омраза кон Македонците е повеќе од потребен и ние како партија со задоволство ќе го поддржиме таквиот предлог.
Ваков е ставот на пратеникот од редовите на ВМРО-ДПМНЕ, Бојан Стојаноски, кој за Плусинфо вели дека со своите лоши постапки Бугарија веќе ги преминала сите граници и дека е дојдено времето Македонија да се ослободи од оковите и да ги покаже забите.
Ние како партија, но и како општество можеме да извршиме притисок врз институциите и да ги натераме да формираат таков регистер каков што предлага екс-амбасадорот Марјан Ѓорчев. Со таков акт којшто е излезен од официјална институција ќе можеме да ѝ докажеме на ЕУ дека се соочуваме со шовинизам од страна на одредени политички чинители на земја членка на Унијата.
– Секоја нормална држава си ги брани своите национални интереси и не дозволува да бидат загрозени. Кога ние ќе застанеме на нашата посебност како држава со нашите национални обележја, одеднаш се појавуваат бугарски европратеници коишто тоа го критикуваат во Европскиот парламент. А видовте што ни се случи во изминатиов пероид? Значи ние можеме овде да дозволиме отворање на културни клубови коишто носат имиња на фашисти, а од друга страна, кога се отвора македонски културен клуб во Благоевград и којшто го носи името на поетот Никола Вапцаров, тогаш тоа не е прифатливо за нив. Јас лично сметам дека не само што ни е крајно неопходен еден таков регистар којшто ќе ги лови сите бугарски зулуми, туку потребна ни е и офанзива во насока на тоа да биде уважена барем една од сите 14 пресуди во судот во Стразбур. На тој начин ќе докажеме дека тие европски вредности коишто ние ги пропагираме важат подеднакво за сите држави. Ние како партија, но и како општество можеме да извршиме притисок врз институциите и да ги натераме да формираат таков регистер каков што предлага екс-амбасадорот Марјан Ѓорчев. Со таков акт којшто е излезен од официјална институција ќе можеме да ѝ докажеме на ЕУ дека се соочуваме со шовинизам од страна на одредени политички чинители на земја членка на Унијата – објаснува Стојаноски.
Јована Мојсоска, членка на президиумот на Левица, во разговор за Плусинфо вели дека идејата да се формира регистар за ловење бугарски говор на омраза е идеална и дека конечно е дојдено времето Македонија да ја спушти рачната кочница, силно да ја притисне педалата за гас и на паметен начин да ја „прегази“ Бугарија.
– Безбедносните служби во Македонија се „издупчени“ како швајцарско сирење. Бугарските тајни служби кај нас слободно си функционираат, се финансираат бугарски невладини организации, а имаат развиено многу силна стратегија и секојдневно активно ловат говор на омраза на социјалните мрежи од граѓани кои кажуваат лош збор за Бугарија. Тие многу добро знаат што прават, бидејќи се свесни оти таа архива што сега ја создаваат во еден момент ќе им заврши голема работа. Затоа, јас апсолутно се согласувам со предлогот на поранешниот амбасадор Марјан Ѓорчев и сметам дека Македонија треба да возврати со иста мера. Институциите во земјава, а пред сѐ Министерството за надворешни работи, конечно треба да соберат храброст и да го формираат регистарот којшто ќе го регистрира секој погрешен чекор на Бугарите во однос на Македонците. Ние дури вчера ја испративме првата писмена протестна нота против Бугарија, а се сеќавате, претходно само тивко ќе спомневме вербална нота и веднаш ќе се заташкаше работата. Но, овојпат, кога директно беше таргетиран премиерот Димитар Ковачевски, дури тогаш нашето МНР одлучи да реагира. Јас сметам дека Македонија мора да почне поагресивно и офанзивно да настапува во поглед на проблемот со соседот, оти доволно време трпевме додека нѐ тепаа. Тоа е апсолутно добар предлог. Јас дури сметам дека треба да го протераме бугарскиот амбасадор од Македонија и да го прогласиме за персона-нон-грата. Во било која друга нормална држава би бил протеран поради безобразното и агресивно делување на неговата земја – објаснува Мојсоска.
Прашањето дали земјава сега има потреба да ги заострува односите во однос на Бугарија и дали и колку е потребно формирање регистар за ловење бугарски говор на омраза го поставивме и до СДСМ, а оттаму ни одговорија дека таков регистар веќе постои во рамки на МНР.
– Министерството за надворешни работи праќа редовни извештаи за секој случај на говор на омраза до бугарското МНР и редовен извештај за имплементација на францускиот предлог до Европска комисија. Овие механизми што ги предлага опозициската ВМРО-ДПМНЕ веќе се користат – ни изјави портпаролот на партијата, Дарко Каевски.
Инаку, поранешниот македонски амбасадор во Бугарија, Марјан Ѓорчев, им предлага на македонските власти да направат анекс на Договорот за добрососедство со Бугарија, но и да воведат регистар и да го бележат бугарскиот говор на омраза упатен кон македонската државност, нација и историските личности, па на месечно ниво во вид на извештаи да го информираат Советот на Европа за постапките на соседите.
Тој вели дека Македонија конечно треба да се разбуди од зимскиот сон и да почне со исти „куршуми“ да возвраќа на бугарските напади и провокации.
– Потребно е да се направи регистер за лажни вести и за говор на омраза, а вработените во секторот за правни работи во МНР треба да ги следат сите бугарски портали, весници, телевизии, да го следат БГНЕС, да го следат бизнисменот Милен Врабески, европратениците Ангел Џамбаски и Андреј Ковачев… Треба будно да го следат секој бугарски чекор и секој месец да испраќаат извештај до Советот на Европа. Мора да промениме нешто, оти гледаме дека досегашна наша политика е неуспешна. Сфаќаме дека дефанзивата и молчењето воопшто не ги смируваат Бугарите, туку напротив, ги разгоруваат нивните апетити. Па, ако гледаме дека вака ништо не постигнуваме, тогаш треба да им кажеме како се чувствуваме и треба да им најавиме дека преминуваме во офанзива. За секој погрешен потег на Бугарите ќе биде информиран Советот на Европа, а ако и тогаш ништо не се промени, тогаш ќе бараме лобирање од Чешка, Словачка, Полска, и од сите други словенски земји – изјави Ѓорчев за Плусинфо.