Д-р Кунгуловски: За да се потврди реинфекција со ковид-19 е потребна ригорозна наука, а во Македонија нема таква студија

За да се потврди реинфекција со ковид-19 потребна е ригорозна наука, односно секвенционирање на вирусот од првиот пример и секвенционирање на вирусот од вториот примерок. Разлики во РНК секвенците може категорично да потврдат дека се работи за инфекција со различен вирус. Но, во Македонија нема таква студија, нема такви докази, напиша на Фејсбук д-р Горан Кунгуловски од Лабораторијата за генетика и персонализирана медицина во приватната клиника „Жан Митрев“.

„Во Македонија за реинфекција се смета втор позитивен резултат кај иста личност што се јавил барем три месеци по првиот позитивен резултат. Но, во Македонија нема силно имуноевазивен сој, односно сој кој избегнува имуна реакција и последователно води до реинфекција (пр. Јужно-африкански)“, пишува Кунгуловски.

Тој наведува две причини поради кои можат да се појават реинфекции.

„Прво, еден од тестовите бил лажно позитивен. На светско ниво околу 3 до 5 отсто од сите позитивни тестови се лажно позитивни поради крос-расејување низ примероците. Зборувам за акредитирани лаборатории, неизбежно е ова. Ова е најверојатното сценарио. Второ, може да постојат траги од истата инфекција којашто се случила пред неколку месеци дури и кај пациенти што имале последователни негативни тестови после позитивниот. Ова е репортирано во светска литература многупати. Затоа препораките од сите сериозни агенции за лекови се да нема повторно ПЦР тестирање кај потврдени ПЦР позитивни случаи во наредните 6 месеци. Тие велат дека дури и кога има симптоми, прво треба да се бара друг предизвикувач на респираторна инфекција, па доколку истиот не се најде, повторно да се тестира за ковид-19. И ова сценарио е реално. Доколку се исклучат овие две точки, дури тогаш можеме да почнеме да размислуваме за реинфекции“, пишува д-р Кунгуловски.