Д-р Кунгуловски: Руската вакцина е одличен кандидат, треба да се одобри што побрзо во Македонија

Руската вакцина треба да биде одобрена за употреба во Македонија најбрзо што може, напиша на својот профил на Фејсбук доктор Горан Кунгуловски, коосновач на Лабораторијата за генетика и персонализирана медицина во Клиниката „Жан Митрев“, објавувајќи податоци за оваа вакцина.

„Излегоа резултатите од клиничката студија во фаза 3 на руската вакцина Sputnik V во реномираното списание The Lancet. Вакцината е базирана на аденовирусна векторска технологија, слично како вакцините на AstraZeneca и Janssen Pharmaceuticals. Резултатите изгледаат одлично! Ефикасноста на вакцината е 91,6% во рок од 21 ден после примањето на првата доза. Далеку подобра од таа на AstraZeneca и Janssen Pharmaceuticals. Ова значи дека дури и една доза од вакцината води до значајна (и можеби и доволна) заштита кај најголем дел од луѓето против ковид-19, во сите старосни граници“, напиша Кунгуловски.

Ете уште еден кандидат којшто треба да биде одобрен за употреба во Македонија најбрзо што може, додава тој.