📽📷 ЦУНАМИ БРАНОВИТЕ СТИГНАА ДО ХАВАИ ПО РАЗОРНИОТ ЗЕМЈОТРЕС КАЈ КАМЧАТКА Жителите се искачуваат на височина, САД во состојба на готовност

Моќен земјотрес со магнитуда од 8,8 степени, што во средата го погоди подрачјето крај источниот брег на Камчатка на Далечниот Исток на Русија, предизвика цунами бранови до 5 метри и поттикна наредби за евакуација на Хаваи и низ целиот Пацифик, објави Ројтерс.

На Хаваи, жителите од крајбрежните области беа повикани да се упатат на повисоки места или барем на четврти кат или погоре од зградите, додека американската крајбрежна стража издаде наредба сите бродови да ги напуштат пристаништата пред доаѓањето на цунамито.

„Преземете акција! Се очекуваат разорни цунами бранови“, предупреди Одделот за вонредни состојби на Хонолулу преку платформата Икс.

Околу 06:00 часот по Гринич, Пацифичкиот центар за предупредување на цунами објави дека бранови од 1 до 1,2 метри веќе го погодуваат Хаваите.

Tsunami waves are hitting Hawaii sudden water level rise seen in Kahului, Nawiliwili, Honolulu, and Pearl Harbor.#Tsunami #earthquakes #Hawaii pic.twitter.com/BEMO82ruC3

— Rebel_Warriors (@Rebel_Warriors) July 30, 2025

Гувернерот на Хаваи, Џош Грин, изјави дека досега нема забележано опасни бранови, но дека сите летови кон и од островот Мауи се откажани.

Во Камчатка, цунами брановите го поплавија пристаништето и една фабрика за преработка на риба во градот Северо-Курилск, при што беа однесени бродови од нивните врски, соопштија руските власти и Министерството за вонредни ситуации.

Земјотресот со плиток епицентар оштети згради и повреди неколку луѓе во оваа оддалечена руска област, додека голем дел од источниот брег на Јапонија – кој беше разурнат од земјотресот и од цунамито од 9,0 степени во 2011 година – беше ставен под наредба за евакуација.

– Денешниот земјотрес беше сериозен и најсилен во последниве неколку децении – рече гувернерот на Камчатка, Владимир Солодов, во видео објава на Телеграм.

Руските научници изјавија дека ова е најсилниот земјотрес што го погодил регионот од 1952 година.

Министерството за вонредни ситуации на Русија соопшти дека била оштетена детска градинка, но поголемиот дел од зградите го издржале потресот. Не се пријавени сериозни повреди или жртви.

Предупредувања низ Пацификот

Цунамските сирени се огласија низ крајбрежните градови на јапонската пацифичка страна, а десетици илјади луѓе добија наредба за евакуација.

Вработените беа евакуирани од нуклеарната централа во Фукушима, каде што цунамито од 2011 година предизвика катастрофа со радиоактивност.

Автопроизводителот Нисан (Nissan Motor) привремено ја прекина работата во одредени фабрики во Јапонија заради безбедност на вработените.

Во Јапонија се забележани 3 цунамски бранови, најголемиот со висина од 1,3 метри. Главниот секретар на јапонската влада, Јошимаса Хајаиши, изјави дека досега не се пријавени повреди или штети, и нема неправилности кај нуклеарните постројки.

САД се на штрек

Американскиот систем за предупредување од цунами, исто така, предупреди на „опасни цунамски бранови“ низ целиот Пацифик.

Бранови повисоки од 3 метри се можни долж делови од руското крајбрежје, северните хавајски острови и Еквадор, додека бранови од 1 до 3 метри е можно да ги погодат Јапонија, Хаваи, Чиле и Соломонските Острови. Помали бранови се можни низ целиот Пацифик, вклучувајќи го и западниот брег на САД.

„Поради силниот земјотрес што се случи во Пацификот, издадено е предупредување за цунами за жителите на Хаваи“, објави американскиот претседател Доналд Трамп на социјалните мрежи.

„Во сила е и предупредување за Алјаска и за пацифичкиот брег на САД“, рече тој.

📷 📽️ ЗЕМЈОТРЕС ОД 8,8 СТЕПЕНИ ПРЕДИЗВИКА ЦУНАМИ Русија, Јапонија и Хаваи наредија евакуација