ЦРНА ГОРА ПРВА ВО „ДИЛАЊЕ“ ДРОГА ВО ЕВРОПА Во земјата се вкрстуваат сите балкански „шверцерски рути“

Црна Гора е прва во Европа и на 14-то место во светот кога станува збор за трговија со дрога, вели ранг-листата на Глобалниот индекс за организиран криминал. Земјата е главната влезна точка за кокаин шверцуван во ЕУ, преку Балканот, претежно од Латинска Америка, јавува МИА.

Кавачки и шкаљарски кланови

Црна Гора главно служи како транзитна зона, без разлика дали станува збор за дрога, оружје или трговија со луѓе, се вели во извештајот за земјата. Пазарот на кокаин е контролиран од неколку мафијашки групи, особено клановите „кавачки“ и „шкаљарски“, се наведува во извештајот.

Се наведува дека хероин од Албанија и Косово се шверцува за Србија и земјите од Европската унија и дека криминалните групи поврзани со тие дејности се карактеризираат со одредено ниво на насилство.

Марихуаната најмногу бидува запленета

„Марихуаната исто така се криумчари преку Црна Гора од Албанија во Србија и БиХ. „Најголемите заплени на дрога се канабисот, кој е најконсумиран во земјата“, стои во Глобалниот индекс за организиран криминал.

Црна Гора е и четврта во Европа по криминал, а следат Русија, Србија и Украина, јави РТЦГ. Кога станува збор за отпорот кон криминалот, како што е наведено во Институтот за алтернативи, од 44 европски земји, Црна Гора е на 38-мо место и 112-то место во светот.

Има три рути по кои се движи оружјето

Кога станува збор за нелегална продажба на оружје, Црна Гора е една од најважните транзитни рути во регионот, од Србија кон Блискиот Исток, од Русија до Северна Африка (претежно до Либија) и од Балканот до Западна Европа, како и од БиХ до Србија и Косово.

„Оружјето најчесто се шверцува со легален товар во приватни возила“, се вели во извештајот.

Политичарите и тајните служби се ортаци со „дилерите“

Меѓутоа, како што се наведува, трговијата со оружје се намалила во 2017 и 2018 година, бидејќи криминалните групи се свртеле кон шверц на цигари и дрога.

Во извештајот се дадени и податоци за трговија со луѓе. Од 2015 до 2019 година биле идентификувани само 22 жртви, но формите на трговија со луѓе и ропство во служба на компјутерскиот криминал стануваат сè пософистицирани.

Во извештајот се наведува дека државните службеници се вмешани во криминал и дека припадниците на полицијата, тајните служби и политичарите им обезбедуваат заштита на криминалците.