🎥 ЧУМУ НИ Е ЕУ АКО ЈА ЗАГУБИМЕ МАКЕДОНИЈА? Ајде да побараме алтернативи по рецептот на Јосип Броз Тито, рече Апасиев во поткастот на Плусинфо

„Црни денови доаѓаат за СДСМ, но бели за Македонија. И тоа е многу добро“.

Ова го изјави лидерот на Левица и носител на листа во Изборна единица 1, Димитар Апасиев, кој гостуваше во поткастот на Плусинфо.

Тој рече дека неговите првични очекувања биле партијата на Димитар Ковачевски да освои помалку од 30 пратеници, но како што вели, резултатите од првиот круг од претседателските избори покажуваат дека бројот на пратеници што ќе го освои СДСМ на парламентарните избори ќе падне под 20.

– Очекував СДСМ да падне под 30 пратеници на овие парламентарни избори, но не очекував дека ќе падне под 20 пратеници. А тоа ќе се случи. Тоа значи дека револтот кон СДСМ како анационална партија е енормен, а не треба да заборавите дека Стево Пендаровски беше кандидат со поголем рејтинг од партијата која го предложи за кандидат за претседател на државата. Тогаш можете да замислите каква им е работата кога оној со поголем рејтинг донел 180.000 гласови. Тоа значи дека партискиот лидер Димитар Ковачевски ќе донесе едвај 150.000 гласови на парламентарните избори. Црни денови доаѓаат за СДСМ, а бели за Македонија. И мислам дека пророштвото за „пасокизација“ на партијата ќе се оствари уште на овие избори. СДСМ повеќе нема да има 30 пратеници и нема ни да ги има. СДСМ ќе се распадне и ќе стане маргинална партија, а можеби ќе ја преземе, односно ќе ја купи некој бизнисмен. Партијата е заштитник на олигарсите и нема врска со социјалдемократијата. Јака им душа. Нека си се снаоѓаат – изјави Апасиев.

На овие избори клучно е да ја „пасокизираме“ СДСМ и тоа е нашата борба, додаде лидерот на Левица.

– На следните избори ќе се случи идеолошкиот судир помеѓу радикалната левица и демохристијанската десница. Тоа значи судир помеѓу Левица и ВМРО-ДПНЕ. И веќе понатаму, кога ќе станеме бели во косите, тогаш ќе станам премиер. Можеби тоа нема да се оствари за брзо време, ама дека еден ден ќе бидам премиер – ќе бидам! – рече отсечно Апасиев.

Во однос на преговорите на Македонија со ЕУ за зачленување во европското семејство, Апасиев вели дека „мудриот политичар секогаш гледа подалеку од носот“.

– Секој бенчмарк, секој извештај, секој услов, целата оваа рамка од ЕУ, е сè поштетна и поштетна за македонското национално ткиво. Оттука, чуму ни е ЕУ ако ја загубиме Македонија? Така што, мудар политичар гледа подалеку од носот и гледа нови алтернативи. Нашата геополитичка перспектива е стратешко партнерство со сите земји членки на Советот за безбедност, тоа се петте големи сили меѓу кои и Кина и Русија. Ние досега имаме само Американците и гледаме дека без разлика на тоа што формално тие се наши партнери, сепак, тие во суштина се партнери на албанското малцинство. И при случај на нов судир помеѓу нас и нив, тие повторно ќе застанат на нивна страна, повторно ќе ги вадат со автобуси од Арачиново… Затоа, ние треба да почнеме да бараме алтернативи по рецептот на Јосип Броз Тито. Тој практично ги создал „неврзаните“. Така што, треба да се игра со сите. Светот е голем за соработка – рече Апасиев.

Во продолжение, погледнете ја целата емисија и стиснете subscribe на нашиот ЈуТјуб канал: