ЧЕТВРТИ МЕСЕЦ АНТИКОРУПЦИСКАТА КОМИСИЈА МОЛЧИ ЗА ПРИЈАВАТА НА ОБВИНИТЕЛОТ ЈОВАН ЦВЕТАНОВСКИ Толку ли е тешко да се каже дали тројца обвинители биле во судир на интереси?

Изминува четвртиот месец откако суспендираниот виш јавен обвинител Јован Цветановски поднел пријава за судир на интереси на државниот обвинител Љупчо Коцевски и на јавните обвинители Лиле Стефанова и Елвин Вели, а Државната комисија за спречување корупција (ДКСК) сè уште не се изјаснила за пријавата.

Според законската постапка за утврдување судир на интереси (член 76 од Законот), ДКСК треба во рок од 15 дена да прибере документи, информации и податоци, а потоа во рок од 30 дена да донесе одлука за постоење или непостоење судир на интереси.

Обвинителот Јован Цветановски ја поднел иницијативата на 24 декември минатата година, во својство на службено лице, повикувајќи се на членот 17 став 1 алинеја 3 од Законот за спречување на корупција и судир на интереси. ДКСК ги пробила сите рокови и сè уште не се изјаснува за пријавата.

Во пријавата на обвинителот Јован Цветановски до ДКСК се вели дека јавните обвинители Љупчо Коцевски, Лиле Стефанова и Елвин Вели биле должни да внимаваат за потенцијален судир на интереси при спроведувањето на надзорот над работењето на Вишото јавно обвинителство Скопје лани во октомври.

Државниот обвинител Љупчо Коцевски знаел дека Лиле Стефанова и Елвин Вели имаат основи за судир на интерес при извршувањето на надзорот, тврди Цветановски. Лиле Стефанова била во судир на интереси по повеќе основи. Таа вршела надзор за два предмета во кои претходно учествувала како обработувач на предметите во прв степен и ги застапувала (првично како обвинител во укинатото СЈО, а подоцна и како обвинитело во ОЈО за гонење организиран криминал и корупција). Надзорот го користела со цел да го оправда незаконитото работење и пропустите кои претходно се утврдени од Вишото јавно обвинителство Скопје, што е документирано и за што е подготвен службен материјал. Суштествена пречка таа да врши надзор е и тоа што била пријавена и има статус на осомничена за кривично дело Злоупотреба на службената положба.

Елвин Вели, пак, пред изборот во Јавното обвинителство на РСМ, до месец август 2023 година, бил Јавен обвинител во Вишото јавно обвинителство Скопје, како заменик на Хајрулахи. Со дел од предметите бил лично запознат, како за нивниот статус така и за одлуките што ги донел Цветановски. Добро бил запознат и со водењето на административно-управниот дел на Вишото јавно обвинителство Скопје, бидејќи и како заменик на ВЈО вршел работи од неговиот делокруг.

Цветановски смета дека во случајот обвинителите што вршеле надзор над работата на скопското Вишо јавно обвинителство биле во „директен и видлив судир на интерес“.

„Љупчо Коцевски, како Јавен обвинител на ЈОРСМ, Лиле Стефанова и Елвин Вели, како јавни обвинители во ЈОРСМ, спротивно на законските и подзаконските прописи и етичките стандарди, како службени лица, при нивните постапувања во конкретниот случај, не обезбедуваат законито функционирање на институцијата Јавно обвинителство, со што не овозможиле владеењето на правото. Утврдениот приватен интерес кој го има Лиле Стефанова влијае врз непристрасноста и врз објективното вршење на нејзините должности како службено лице во вршењето на надзорот“, се вели во образложението на пријавата до ДКСК и се додава дека Елвин Вели „вршел службени дејствија во Вишото јавно обвинителство Скопје како заменик на јавниот обвинител на Вишото јавно обвинителство Скопје, што влијае врз непристрасноста и објективното вршење на неговите должности како службено лице во вршењето на надзорот“.

Зошто ДКСК молчи за пријавата на обвинителот Цветановски?

Во обвинителски кругови се шпекулира дека причината за тоа би можела да биде тоа што предметот е паднат во рацете на член на ДКСК (известител), кој има блискост со обвинителот Гаврил Бубевски. А обвинителот Цветановски и поранешниот шеф на скопското Вишо јавно обвинителство Мустафа Хајрулахи паднаа на удар на државниот обвинител Љупчо Коцевски, откако се спротивставија да се затвори предметот за незаконските бонуси поделени во некогашното Специјално јавно обвинителство на Катица Јанева. Меѓу засегнатите обвинители на поранешното СЈО е и спомнатиот Гаврил Бубевски.