ЧЕШКА ЌЕ ИСПРАТИ СОВЕТСКИ ТЕНКОВИ ВО УКРАИНА Своите сили ќе ги обнови со старо-нови германски „Леопарди“
Германските тенкови со кои Чешка ќе се поднови би можеле да бидат „некаде на средина“ помеѓу старите „Леопард 1“ и поновите „Леопард 2“ верзии.
Официјална Прага преговара со Берлин за купување германски тенкови, што ќе ѝовозможи на Чешка да испрати повеќе тенкови од советската ера во Украина, изјави синоќа министерката за одбрана Јана Чернохова.
Чешка би можела да набави тенкови „Леопард“ од Германија, веројатно не најмодерна варијанта, изјави Чернохова за чешката телевизија.
– Мислам дека сме на вистинскиот, добар пат – рече таа.
Таа додаде дека тие би можеле да бидат „некаде на средина“ помеѓу старите „Леопард 1“ и поновите „Леопард 2“ верзии.
Чешка има 30 модернизирани тенкови „Т-72“ и уште неколку десетици кои не се модернизирани.
Од почетокот на руската инвазија на 24 февруари, Чешка испрати некои од своите немодернизирани тенкови во Украина.
Чесите испратија и тешко оружје во Украина од воени складишта и приватни компании за оружје, вклучувајќи артилерија, борбени возила, противвоздушна опрема и повеќецевни ракетни фрлачи.