ЦГК: Само пет фрими се офајдија од итните јавни набавки вредни 3,2 милиони евра
За повеќе од половина од склучените договори (59 %), институциите ја прекршиле законската обврска да ги објават договорите во рок од десет дена од потпишувањето и дека во секој втор склучен договор за итните јавни набавки поврзани со коронавирусот се преговарало само со еден понудувач.
Вредноста на договорите за итните јавни набавки поврзани со заштита од коронавирусот надмина 3,2 милиони евра со склучени 142 договори, а 71 отсто од вредноста на склучените договори отпаѓа само на пет фирми, покажува анализата на Центарот за граѓански комуникации.
„Во отстуство на упатство или стандардни обрасци за набавка, продолжуваат значајните разлики во цените. Во овој период, најголеми разлики се забележуваат кај скафандерите и ракавиците. Скафандерите се купувале по цени од 262 до 1.156 денари, а ракавиците од 2,83 до 9,32 денари за парче“, наведуваат од Ценарот.
Оттаму додаваат дека за повеќе од половина од склучените договори (59 %), институциите ја прекршиле законската обврска да ги објават договорите во рок од десет дена од потпишувањето и дека во секој втор склучен договор за итните јавни набавки поврзани со коронавирусот се преговарало само со еден понудувач.
Сѐ уште нема информации за исходот од владините огласи за интервентни набавки на маски и ракавици.
Анализата покажува и дека преку директни преговарања без претходно објавување оглас биле склучени 142 договори.
„Најголема вредност на склучените договори има МВР, кое склучило шест договори во вкупна вредност од 1,9 милиони евра, што е дури 59 отсто од вредноста на договорите на сите институции. Станува збор за договори за набавка на маски, ракавици, очила, комбинезони и средства за дезинфекција. Второ според вредноста на договорите е Министерството за здравство, со 14 договори во вредност од 321.081 евро за набавка на монтажни контејнери, реагенси, потрошен материјал, дезинфекциски средства и заштитна лична опрема“, наведуваат од Центарот.
Дополнително на 142-та договори,како што стои во анализата, објавена е и уште 51 одлука за избор на најповолен понудувач, во вкупна вредност од 701.230 евра.
Според анализата најголем број од набавките добиле пет фирми. „Гифтитекс“ од Прилеп добил вкупно две набавки со вредност од над 1,1 милион евра, „Биотек“ од Скопје добил една набавка во вредност од близу 660 илјади евра, „Алкалоид“ од Скопје добил 14 набавни со вкупна вредност од над 247 илјади евра , Брако од Велес добил една набавка со вкупна вредност од 147 илјади евра и и Еуро-фарм од Битола добил 12 набавки со вкупна вредност од 121 илјада евра.