ЦЕНАТА НА НАФТАТА СКОКНА ЗА 25% Барелот сега чини 110 долари, а се очекува уште да поскапува

Цените  на нафтата утрово скокнаа за 25% на повеќе од 110 долари за барел, додека берзите забележаа остар пад поради ескалацијата на војната меѓу САД и Израел против Иран. Конфликтот ги поттикна стравувањата од долгорочно нарушување на снабдувањето преку Ормутскиот теснец.

На азиските берзи утрово Суровата нафта Брент порасна за речиси 24% на 114,74 долари, додека Нимекс (лесна сурова нафта) порасна за повеќе од 26% на 114,78 долари.

Прогнозите минатата недела беа дека цената на  нафтата ќе достигне 100 долари оваа недела. Всушност, беше потребна околу една минута за цената да скокне за 10%, а потоа уште 15 минути за дополнителен раст од 10% за време на тргувањето на азиските берзи.

Аналитичарите предупредуваат дека ако блокадата на Ормутскиот теснец трае до крајот на март, би можеле да видиме рекордни цени на нафтата над 150 долари за барел.

Иран во неделата го именуваше Моџтаба Хамнеи за наследник на неговиот татко Али Хамнеи за врховен лидер, сигнал дека една недела по почетокот на конфликтот, тврдокорните сè уште остануваат на чело на земјата.

Во текот на викендот, САД и Израел започнаа нови бранови воздушни напади низ Иран, погодувајќи бројни цели, вклучувајќи ги и нафтените депоа.

Големите прекини во снабдувањето со енергија од овој регион се закануваат да ги зголемат цените за потрошувачите и компаниите низ целиот свет.

Околу една петтина од светските резерви на нафта обично се транспортираат преку Ормутскиот теснец. Сепак, сообраќајот низ овој тесен премин е речиси целосно запрен откако започна војната пред седум дена.

Растечките цени на нафтата би можеле да ја зголемат и цената на дериватите како што се горивото за авиони и виталните суровини за вештачки ѓубрива.

Физичките залихи од Заливот главно ги троши Азија, но веќе има знаци дека азиските потрошувачи ги зголемуваат цените на американскиот гас, а некои танкери првично наменети за Европа се свртуваат во средината на Атлантикот.