БУРА ВО ЧАША ВОДА ПО ИЗЈАВАТА НА МУЦУНСКИ ЗА ПРОТОКОЛИТЕ Бујар Османи ја спинува, бугарски медиуми ја напаѓаат, а промена на македонската позиција нема
Изјавата на министерот за надворешни работи Тимчо Муцунски дека протоколите не се правен дел од Преговарачката рамка предизвика бурни реакции во повеќе македонски и бугарски медиуми. Шефот на македонската дипломатија за Плусинфо потврди дека нема промени во македонската принципиелна позиција во однос на пристапниот процес кон ЕУ.
„Протоколите не се правен дел од Преговарачката рамка. Но, целосно сме свесни за политичките обиди билатералните прашања да се користат за влијание врз пристапниот процес во ЕУ. Суштината на проблемот е што Бугарија има поинакво толкување и ги третира т.н. протоколи како составен дел од Преговарачката рамка, додека нашиот став е дека станува збор за одвоени документи. Токму оваа разлика во толкувањето ја потврдува потребата од јасност, предвидливост и гаранции дека процесот на пристапување ќе се води врз основа на европските критериуми, а не на билатерални интерпретации“.
Ова за Плусинфо го изјави министерот за надворешни работи Тимчо Муцунски, откако неговиот став дека протоколите не се дел од Преговарачката рамка, соопштен на прес-конференција, дел од медиумите го протолкуваа како промена на позицијата на македонската дипломатија во однос на пристапниот процес кон ЕУ.
Спиновите ги поттикна и Бујар Османи, актуелен потпретседател на ДУИ и поранешен министер за надворешни работи, потписник на спорниот Втор протокол.
– Четири години велам дека протоколите не се дел од Преговарачката рамка. Четири години трпам критики, напади и навреди. Четири години цртам на табли, објаснувам, повторувам. Еден чекор поминат – напиша Османи на својот Фејсбук профил и ја сподели изјавата на Муцунски.
Од друга страна, бугарски медиуми ја критикуваа изјавата на Тимчо Муцунски, повикувајќи се на членот 5 од Преговарачката рамка, кој, според нив, упатува на членот 12 од Договорот за добрососедство со Бугарија и значи дека спроведувањето на протоколите е вградено како механизам според кој ЕУ го оценува напредокот на Македонија.
На прашањето на Плусинфо во што се состои е разликата меѓу неговото тврдење и тезите на Бујар Османи, министерот Муцунски е категоричен:
– Разликата е суштинска. Ние не тврдиме дека билатералните прашања не се користат за влијание врз пристапниот процес. Напротив, токму затоа бараме јасни, правно издржани и недвосмислени гаранции. Но, не смееме да прифатиме теза дека т.н. протоколи се правен дел од Преговарачката рамка, бидејќи тоа едноставно не е така. За жал, токму Бујар Османи беше оној којшто зад затворени врати, во разговорите со тогашната бугарска влада, ја застапуваше тезата дека протоколите се правно обврзувачки документи. Денес, кога ние ја браниме правната вистина и бараме јасни гаранции дека билатералните толкувања нема да станат европски критериуми, обидот тоа да се претстави како промена на позицијата е целосно неоснован.
Шефот на македонската дипломатија повторува дека разговорите со земјите членки на ЕУ, со европските институции и со Бугарија продолжуваат.
– Постои позитивен импулс за изнаоѓање решение, но во овој момент нема договор што може да биде презентиран пред јавноста. Ние немаме друга алтернатива освен да бараме решение, но тоа нема да биде решение по цена на македонскиот идентитет, јазик, историја и култура. Нашата цел е европски пат заснован на доверба, правна сигурност и заемно почитување, а не на нови билатерални условувања – категоричен е Муцунски.