БУГАРСКА ДЕЛЕГАЦИЈА МУ ОДДАДЕ ПОЧИТ НА ВЕЛИКАНОТ Демирџиев задоволен што Џамбаски го послушал да не дојде (ГАЛЕРИЈА)
Бугарскиот министер за внатрешни работи се надева дека на сите бугарски државјани кои тргнааа кон Скопје ќе им биде овозможено да дојдат во црквата „Свети Спас“.
Бугарска делегација предводена од министерот за внатрешни работи Иван Демирџиев положи цвеќе на гробот на Гоце Делчев денеска, на одбележувањето во црквата „Свети Спас“. Во делегацијата се и министерот за здравство на Бугарија, Асен Меџидиев и заменик-министерот за внатрешни работи Венцислав Катинов.
– Задоволен сум од организацијата на настанот и чест ми е што сум тука со бугарската делегација за да му оддадам почит на великанот Гоце Делчев. Нема причина за провокации. Ние треба да одиме напред, а тоа е обединета Европа, тоа налага стабилност. Ние сме должни да изградиме сигурност и стабилност меѓу народите на двете држави. Ние не дојдовме овде да правиме провокации, туку да покажеме почит, соседи сме и добрососедството треба да продолжи. Се надевам дека на сите бугарски државјани кои тргнааа кон Скопје ќе им биде овозможено да дојдат во црквата „Свети Спас“ – рече Демирџиев.
Тој изрази жалење што тие неколку часа стотина Бугари чекале на граничниот премин Деве Баир затоа што „снемало струја“ и рече дека во понеделник ќе донираат три агрегатори за струја, за повторно да не се случат такви проблеми.
Демирџиев лично ги замолил Костадин Костадинов и Ангел Џамбаски денеска да не го посетат Скопје, за, како што рече, да се избегнат конфликти и изрази задоволство што тие го послушале.