БУГАРИТЕ НА ФИЛМ ЌЕ ДОКАЖУВААТ ДЕКА НЕ БИЛЕ ФАШИСТИ Последно, наместо трето полувреме? (ВИДЕО)

Бугарски пандан на нашиот филм „Трето полувреме“, наречен „Последно полувреме“ ќе докажува дека Бугарите во Македонија не биле фашисти, а моментално филмот се преведува и на англиски јазик. Режисерот, продуцент и писател Степан Полјаков и објаснува дека тоа е филм за фалсификувањето на историјата во кој е раскажана вистинската приказна за фудбалскиот натпревар меѓу „Левски“ и скопскиот тим „Македонија“ кој се одиграл во март 1942 година, пренесува МКД.

Како што вели Полјаков во интервју за БГНЕС, мечот завршил со 3:0 за „сините“, но интересен факт е што тогаш натпреварите започнувале со нацистички поздрав, а на овој еден од клубовите одбил да го направи тоа. Тоа биле фудбалерите на „Левски“. Оваа вистина, според Полјаков, е извртена во македонскиот филм „Трето полувреме“ во кој Бугарите се претставени како нацистички чудовишта.

– Филмот е наречен „Последно полувреме“ за да ги затвори сите полувремиња меѓу нас и РСМ. Во него се прикажани оригинални снимки. Во тоа време нашиот клуб „Левски“ и нашиот клуб „Скопје“ играат натпревар во домашното првенство, фудбалерите на „Левски“ одбиваат да кренат рака, а тоа го прават момците од Македонија. Се креваше рака како нацистички поздрав во Берлин, Рим, Виена, па дури и во Лондон, а само во Софија рацете остануваа спуштени. Бугарија е ослободена од фашизмот – вели Полјаков.

Според него, обидот на „Трето полувреме“ и на современите македонските политичари да ги претстават Бугарите како фашисти и нацисти не е добар. Напротив, требало да се зборува за луѓето како играчите на „Левски“ кои ризикувале многу, одбивајќи да кренат рака.

– Тие луѓе на некој начин се херои, кои не ги препознаваме денеска и ние треба да зборуваме за тие луѓе, а не за глупостите во Македонија – вели авторот на филмот.