БРИМА: Не е точно дека не сме спровеле анкета, ние не ја објавивме, туку клиентот

Наводите дека БРИМА воопшто не спровела анкета не се точни. Уште еднаш објаснуваме дека БРИМА не ја објавила анкетата а истата ја спровела во наведениот период, соопшти денеска Канцеларијата на БРИМА во Македонија.

Оттаму додаваат дека истражувањето во јунскиот бран се спровело од 5 до 14 јуни 2020 со телефонска анкета (CATI) со национално репрезентативен примерок N=1.174 испитаници на возраст 18+ години.

„Понудата ја прифати еден од клиентите со ексклузивно право на користење и објавување. Дополнително БРИМА на 05 јули 2020 има пратено до сите медиуми информација – корекција во која се појаснува точниот датум кога анкетата е спроведена“, соопшти БРИМА.

БРИМА четири пати годишно редовно спроведува Омнибус истражување повеќе години. Во рамките на ова истражување е и секцијата за социо-политички стандардизирани прашања во рамки на Политичкиот барометар на БРИМА. Овие податоци кои се сопственост на БРИМА, канцеларијата ги нуди на потенцијални клиенти кои се заинтересирани за нив.