Бразил: 20.000 заболени од ковид-19 во еден ден, министрите за здравство поднеле оставка

Состојбата повразана со ковид-19 значително се влоши во Бразил, а оваа јужноамериканска земја наскоро би можела да стане втора по бројот на заболени во светот, пренесува „Гардијан“.

Според податоците на Министерството за здравство на Бразил, за само еден ден, скоро 20.000 луѓе се разболеле во таа земја, а 888 лица починале.

Досега од коронавиурост во Бразил се заболени 291.579, додека бројот на починати изнесува 18.559 лица.

Во понеделникот, 1.179 луѓе починаа за еден ден во Бразил, надминувајќи ја Велика Британија во неславниот рекорд по бројот на смртни случаи.

Бразилскиот претседател Жаир Болсонаро беше критикуван за неговиот одговор на епидемијата на вируси, а двајца министри за здравство, лекари по професија, поднесоа оставки за многу кратко време, како резултат на несогласувањата со него.

Администрацијата на бразилскиот претседател вчера одобри употреба на хлорокин, лек против маларија, кој неговиот американски колега Доналд Трамп го промовираше како терапија за новиот коронавирус.