Боб Дилан ги продаде правата на своите 600 песни за 300 милиони долари

Боб Дилан, чии песни станаа симбол на антивоените протести и движењето за човекови права од 60-те години на минатиот век, и кој се смета за еден од најголемите музички текстописци во Америка, го продаде сиот свој каталог на песни на компанијата „Јуниверзал мјузик груп“.

Како што синоќа соопшти компанијата, со договорот таа ги откупи правата на повеќе од 600 песни на Дилан, „од културниот темелник „Blowin’ in the Wind“од 1962 година, до овогодишниот еп „Murder Most Foul“

Сите овие песни сега се во сопственост на медискиот гигант.

– Не е претерување ако се каже дека овој огромен труд го љубат и обожуваат милијарди луѓе низ целиот свет.Не се сомневам дека и по многу децении, па и векови, словото и музиката на Боб Дилан ќе продолжи да се пее и свири, и да се цени, насекаде, изјави Лучијан Грејнч, претседател и главен менаџер на „Јуниверзал мјузик груп“.

Според овој „пресвртен договор“, компанијата нема право да ја открива сумата што му е исплатена на Дилан, но извор запознат со договорот открива дека се работи за „девет цифрена бројка во вредност од повеќе од 300 милиони американски долари“.

Дилан е првиот рок-музичар во светот кој има добиено Нобелова награда за литература.

Неговиот портпарол синоќа изјави дека музичарот нема да коментира и да дава изјави за договорот.
Исплатата за првото музичко издание на Дилан во 1962 година вредела само 100 долари.