Битолчанка од поранешен партнер барала 13.000 евра за да не објави компромитирачки фотки

Скопското обвинителство поднесе обвинение против 34-годишна битолчанка која за пари го уценувла поранешниот партнер.

– Во периодот од 15 јануари до 11 март, обвинетата со намера да се стекне со противправна имотна корист, во повеќе наврати му се јавувала на оштетениот со кого претходно била во љубовна врска, барајќи парични средства со уцена дека доколку не и ги даде парите ќе испрати компромитирачки фотографии од него на неговото семејство и ќе ги објави на социјалните мрежи со цел да ги наруши неговите чест и углед, како и честа и угледот на неговото семејство. Продолжувајќи со  истите закани и уцени, на 10 март 2020 година, обвинетата го  контактирала оштетениот преку апликациите Viber и WhatsApp, при што побарала од него следниот ден, на 11 март во 14 часот, да и донесе 1200 евра  во хотел во Скопје, а остатокот од побараните 13.000 евра  да и бидат исплатени дополнително, соопшти Обвинителството.

По преземање на оперативно технички мерки и претходна крим-техничка обработка на паричните средства, обвинетата беше лишена од слобода во моментот кога бараните средства ги зеде од оштетениот.

Јавниот обвинител до Основниот кривичен суд Скопје со обвинението достави и посебен предлог за продолжување на определената мерка куќен притвор за обвинетата, бидејќи постои опасност  да се крие или да се даде во бегство.​