БИТКАТА ЗА УКРАИНА МОЖЕ ДА ОТПОЧНЕ? Војските се распоредени, дипломатите денеска преговараат

Пола од украинската војска, или 125.000 војници веќе се преместени во проблематичниот пограничен регион Донбас, а од другата страна 90.000 Руси, заедно со оклопни возила и авиони на готовс го чуваат „студениот мир“ меѓу Истокот и Западот. Што ќе донесе денешната средба во Шведска на министрите за надворешни работи на САД и Русија, Ентони Блинкен и Сергер Лавров?

Русија има планови да преземе „значајни агресивни потези“ против Украина, а Вашингтон „ќе биде подготвен да дејствува“ доколку Русија ја нападне Украина предупреди вчера од Рига американскиот државен секретар Антони Блинкен. Тој додаде дека САД се „длабоко загрижени од доказите дека Русија направила планови за значителни агресивни потези против Украина“, пишува АлЏезира.

Рускиот претседател Владимир Путин во вторникот, строго го предупреди НАТО да не распоредува војници и оружје на „руската црвена линија“ во Украина.

– Евентуалниот одговор на САД на дејствијата на Русија против Украина ќе биде договорен со меѓународната заедница – изјави денеска американскиот секретар за одбрана Лојд Остин, веројатно мислејќи на жестоки санкции кои веројатно ќе значат и блокирање на руски банкарски сметки и отсекување на трговските врски со Западот. 

Украинците распоредија 125.000 војници во Донбас, имаат уште толку

Официјалните претставници на Русија објавуваат извештаи за голема раздвиженост на украинската војска, чии единици наводно почнале да се групираат во регионите што граничат со Донбас, побунетата територија на Украина.

– Според извештаите со кои располагаме, во зоната на конфликтот Украина располага со 125.000 војници, што е пола од вкупниот број на припадници на војската на оваа земја – изјави Захарова.

Пред неколку дена од редовите на НАТО беше изразена загриженост за големиот број на руски војници, стационирани на границата со Украина. Во јавноста беа извадени и разузнавачки информации, според кои, Русија е во завршната фаза од подготовките за инвазија на Украина. Украинската влада отиде до таму, што објави дека Кремљ подготвувал насилна промена на власта во Киев, преку свои паравоени структури присутни во Украина.

Руските власти претходно рекоа дека ставот на Москва кон Украина е чисто одбранбен и го обвинија Киев дека планира да ги врати со сила областите што ги држат проруските бунтовници во источна Украина. Украинските власти го отфрлија обвинението.

Русија ќе го освојува Крим од три страни, со авиони, подморници и 90-илјадна пешадија

Повеќе од 90.000 руски војници чекаат на украинската граница за можен напад и инвазија врз земјата, која според шефот на украинското разузнавање Кирило Буданов може да биде во јануари оваа зима и тоа од три страни.

Од исток во Одеса и Марипул ќе дејствуваат десантните подморници „амфибии“, копнен напад ќе следува од Полуостровот Крим, на небото над побунетата област Донбас ќе летаат авионите, а крајниот удар ќе го зададат 3.000 обучени резервисти кои ќе влезат во земјата од белоруска територија.

– Нападот што Русија го подготвува ќе биде многу поразорен од што било досега видено во конфликтот што започна во 2014 година, во кој беа убиени околу 14.000 Украинци – вели Буданов.

Освен што го зголеми бројот на војниците по границата, Русија таму поставува и системи за балистички ракети со краток дострел „Искандар“ и друго оружје. Се чини дека ни бруталната руска зима нема да ги одврати од војна ни едните ни другите.

Лукашенко призна дека Крим е руски, Украина збесна

Белорускиот претседател Александар Лукашенко го призна анектираниот украински црноморски полуостров Крим за руски, првпат по долг период на воздржаност, јавува МИА.

– По референдумот, Крим стана и де јуре руски – рече 67-годишникот, мислејќи на контроверзниот референдум во 2014 година, по кој Русија го анектираше Крим и покрај острото противење на меѓународната заедница.

Рускиот министер за надворешни работи Сергеј Лавров истакна дека „ништо не треба да се направи и не треба да се носат закони“ за признавање.

– Ќе ги проценуваме неговите постапки (на Лукашенко). Доколку Белорусија навистина ја признае незаконската окупација на Крим од страна на Русија, тоа ќе им зададе непоправлив удар на украинско-белоруските односи. Ние ќе делуваме сеопфатно, рече Кулеба во Рига, каде присуствуваше на состанокот на министрите за надворешни работи на земјите членки на НАТО.

Тој, исто така, додаде дека Крим не е прашањето „каде Украина може да си дозволи да биде воздржана“.

Беспилотните летала ќе ги замајуваат руските авиони?

Времето тече, Американците финансираат, а Украина купува ракети Javelin и беспилотни дронски системи. Системите AN/TPQ-53 беа користени со голем ефект, претходно изјавија за Military Times украинските воени претставници.

Шефот на украинското разузнавање Буданов објасни дека системите Javelin веќе биле користени против руските сили. Тие, заедно со беспилотните летала од турско производство – „Барјактар“, кои се користат против сепаратистичките артилериски трупи подредени на Русија, имаат значителна психолошка одвраќачка вредност, што ќе ги натера Русите двапати да размислат зпред да нападнат.

Ракетните батерии „Патриот“, противракетните, артилериските и минофрлачките системи сè уште се на списокот на желби на Украина.

Како започна кризата?

Кризата во Украина започна во 2013 година кога тогашниот украински претседател Виктор Јанукович одби договор за поголемо економско зближување со Европската Унија. Украинците излегоа на протести во Киев, а Јанукович ја напушти земјата. Во март 2014 година руската војска стационирана во базата во Севастопољск влезе без оружје во градовите на Крим и за кратко време ја презедоа целосната контролата врз полуостровот. Додека траеа овие операции на Крим, растеше поделбата во Украина.

Во протестите официјално загинаа 10.300 луѓе, а беа повредени 24.000. Два месеца подоцна Кримјаните на референдум одлучија дека сакаат да се отцепат од Украина и да се присоединат на Русија.