БЕЗ СПРОВЕДУВАЊЕ НА ПРЕПОРАКИТЕ СЛЕДУВААТ НЕПРИЈАТНИ ПОСЛЕДИЦИ Бугарските историчари потсетуваат дека постои механизам за стопирање на преговарачкиот процес со ЕУ

Заменик-претседателот на бугарската Комисија за историски и образовни прашања, Наум Кајчев, очекува досега усвоените препораки да бидат имплементирани и во Македонија и во Бугарија, а како што вели, доколку Скопје не го спроведе тоа што е договорено, тогаш ќе биде активиран механизам со кој ќе се попречи преговарачкиот процес на земјава со ЕУ.

– Ако не ги спроведат препораките, тогаш тоа значи дека Договорот не е исполнет. Во тој случај ќе следуваат непријатни последици за имплементирање на Договорот, а тоа, пак, си носи други последици – изјави историчарот Кајчев за БТВ, пренесе Алсат-М.

Македонскиот вицепремиер за европски прашања, Бојан Маричиќ, токму на денешната прес-конференција истакна дека сето тоа што е договоремо меѓу историчарите треба да се исполни, на база на реципроцитет, односно во истиот момент кога тоа ќе го стори и Софија.

За таа цел, посочи вицепремиерот, во МНР веќе се формирани работни групи коишто се задолжени за имплементација на препораките на историчарите.

– Со Протоколот што е потпишан минатиот месец, Владите имаат обврска во рок од две години откако се постигнати некакви резултати, да ги спроведат. Секако, тоа оди во фази и оди низ филтрите на институциите. Нам ни е важно да тече таа дискусија и да има можност резултатите од работата на Историската комисија да бидат преточени во општеството без да се загрози нашиот идентитет и сигурен сум дека е тоа можно – рече Маричиќ.