БЕСА ЈА ПОБЕДИ ДУИ ВО ТЕТОВО Во Советот на Тетово ВМРО-ДПМНЕ ќе има 4, а СДСМ 2 советника
За градоначалник на Центар Жупа е избран единствениот кандидат Аријан Ибраим од ДПТМ, а во Маврово-Ростуше, победи кандидатот на СДСМ Медат Куртовски.
Државната изборна комисија синоќа ги соопшти првичните резултати од изборите за градоначалник на Центар Жупа и на Маврово-Ростуше и за членови на Советот на Општина Тетово.
Според овие резултати, во Центар Жупа за единствениот кандидат Аријан Ибраим од ДПТМ гласале 3340 гласачи од вкупно 3395 гласачи. Како што соопшти доцна синоќа претседателот на ДИК Александар Даштевски, имало 55 неважечки ливчиња.
Во Маврово-Ростуше, кандидатот на СДСМ Медат Куртовски освоил 3266 гласови, а Мевмед Џафери од ВМРО-ДПМНЕ 1935 гласови. Излезноста била 54,24 проценти, а имало 195 неважечки ливчиња.
Во Советот на Општина Тетово, според првичните резултати, најмногу мандати има освоено БЕСА, вкупно 12 со освоени 9.620 гласа, по што следуваат ДУИ со 11 мандати и освоени 8.702 гласа, ВМРО-ДПМНЕ со четири мандати и освоени 3.332 гласа и СДСМ со два мандата и освоени 1.953 гласа. По еден мандат во Советот на Општина Тетово имаат освоено Алтернатива со 1.118 гласа и ДПА со 1058 гласа. На гласањето за Советот на Тетово излезноста била 35,31 отсто и имало 651 неважечко ливче.
Почнува да тече рокот за приговори кој изминува во понеделник до 19 часот, додека рокот за сумирање и објавување на резултатите е до вторник до 01 часот.