Белградскиот саем и натаму дестинација за вакцинација на Македонците

Освен во Бујановац, Врање, Ниш, македонските граѓани и понатаму се вакцинираат на белградскиот Саем.

– На пунктот на белградскиот саем дневно се вакцинираат меѓу 300 и 500 граѓани, а за време на викендите се вакцинираат меѓу 600 и 800 лица, а половината од нив се државјани на Северна Македонија и Босна и Херцеговина – изјави за агенцијата Бета координаторката на пунктот на Саемот, Светлана Мичиќ.

Покрај ревакцинацијата, на белградскиот Саем главно се вакцинираат државјани на Северна Македонија кои патуваат во странство.

– Продолжуваме да ги вакцинираме луѓето кои не се жители на Србија, од Босна и Херцеговина и Македонија, но одзивот од сите овие земји се намалува. Најчесто доаѓаат да се вакцинираат луѓето што патуваат во странство, имајќи предвид дека мерките се засилени во сите земји, да не може да се влезе во ресторан, а ова е многу поекономично, бидејќи преку вакцинацијата не треба да се прави ПЦР тест и не мора да се плаќа карантин во тие земји. Предлог е вакцинацијата да не се препорачува, туку да биде задолжителна во многу земји – изјави за Курир д-р Снежана Калабиќ.

На граѓаните на Саемот достапни им се вакцините на „Фајзер“, „АстраЗенека“, „Синофарм“ и „Спутник V“ со кои можат да се вакцинираат секој ден од 8.30 до 15.30 часот.

Според податоците на Здравствениот центар во Врање, до 23 јули годинава на вакциналниот пункт во Спортсака сала во овој град вкупно со првата доза вакцинирани се 12.006 македонски граѓани, додека со втората доза вакцинирани се 9.392 наши државјани.