„БЕХТЕЛ И ЕНКА“ ВО ЈУНИ ДОБИЛ 13,5 МИЛИОНИ ЕВРА ОД ДРЖАВАТА Што е сработено за овие пари?
За првата делница Тетово - Гостивар завршени се 100% од геотехничките истражувања, за делницата Букојчани-Гостивар се реализирани 74%, а за Прилеп-Битола 63%.
На конзорциумот „Бехтел“ и Енка“, изведувач на автопатските делници на коридорите 8 и 10д (Тетово-Гостивар, Гостивар-Букојчани и Прилеп-Битола) во јуни му биле исплатени 830.336.364 денари (13,5 милиони евра) од страна на Државни патишта, покажува Извештајот од надзорот за прогрес на работите.
Според Извештајот заклучно со јуни завршени се 87% од проекциите за експропријација за автопатската делница Тетово – Гостивар, 78% за Гостивар – Букојчани, а 78% за делницата Прилеп – Битола.
За првата делница Тетово – Гостивар завршени се 100% од геотехничките истражувања, за делницата Букојчани-Гостивар се реализирани 74%, а за Прилеп – Битола 63%.
Евидентиран е и напредок од 72% на работите за спецификација и проектирање на автопатот Тетово – Гостивар, од 36% за Букојчани – Гостивар, а од 52% за Прилеп – Битола.
Во активностите, изведувачот заклучно со јуни ангажирал 2.029 лица и 10.141 градежна машина.
Од почетокот на годинава, покрај исплатата на 830.336.364 денари во јуни, кон „Бехтел и Енка“ имаше две исплати во април, од 599.794.350 денари и од 524.972.228 денари, како и една во мај од 681.026.665 денари. Заклучно со минатата година, пак, беа исплатени 261 милион евра.
Од четирите планирани делници со Договорот со „Бехтел и Енка“ во вредност од 1,3 милијарди евра што беше склучен во март 2023 година, нема никакви активности за Требеништа – Ќафасан, каде, според најавите, ќе се ревидира трасата за да се зачува заштитениот статус на Охридско Езеро и регионот.