Барања за субвенции за инвертер поднеле околу 2.500 граѓани
Граѓаните веќе започнаа со предавање на старите печки со што се овозможува и формално да започне исплатата за купените инвертери - изјави денеска скопскиот градоначалник Петре Шилегов.
Околу 2.500 граѓани поднеле барања за субевции за инвертери во Скопје. На неколку пунктови тие веќе почнале да ги оставаат своите стари грејни тела, што е услов за исплата на субвенцијата, која треба да почне наредната недела.
– До крајот на минатата недела имаше околу 2.500 апликации за инвертери. Граѓаните веќе започнаа со предавање на старите печки со што се овозможува и формално да започне исплатата за купените инвертери – изјави денеска скопскиот градоначалник Петре Шилегов.
Тој појасни дека постапката за субвенциите била во застој поради изборите и формирањето на новата Влада.
– Кога таа пречка формално правно беше отстранета, на определени пунктови граѓаните веќе почнаа да ги оставаат своите поранешни грејни тела за да ја добијат субвенцијата – вели Шилегов.
Исплатата на субвенцијата за инвертери, појасни тој, ќе почне од наредната недела, а веќе е почната исплата на субвенции за велосипеди и другите субвенции кои ги врши Градот Скопје.
Повикот ги опфаќа граѓаните кои купиле инвертер од 1.1.2020 година, до завршувањето на повикот на 30.11.2020 години или до денот на исцрпување на средствата. На граѓаните ќе им бидат целосно надоместени трошоците за набавка на инвертер-уред, но не поголема од 62.000 денари во нето износ. Според информациите кога беше објавен повикот, се планира да бидат дадени субвенции за околу 5.000 апликации.