ЈАВНИОТ СЕКТОР ЌЕ ГИ ПЛАЌА ФАКТУРИТЕ ЗА 50 ДЕНА ВО СЛЕДНАТА ГОДИНА Дали ова ќе стане реалност зависи од пратениците
Измените на законот предвидуваат постепено намалување на рокот за плаќање на јавниот сектор кој во 2025 година треба да стигне до 1 месец.
Од 1 јануари јавниот сектор ќе треба да ги плаќа фактурите кон приватниот сектор за 50 дена. Сепак услов за да почне примената на овој рок е пратениците да ги прифатат измените на Законот за финансиска дисциплина кој од август е во Собранието. Законските измени се дел од обврските на земјава за намалување на задоцнетото плаќање кое е практика во земјава поради која стопанствениците секојдневно реагираат бидејќи јавниот сектор секој месец трупа долгови кон нив. Во јуни овој долг изнесуваше близу 100 милиони евра.
Досегашното решение предвидува рок на плаќање на фактурите од 60 дена.
Но, ова е само почеток на намалување на рокот за плаќање на јавниот сектор кон приватните компании. Веќе следната 2024 година тој рок ќе се намали на 40 дена, додека овој рок во 2025 години ќе биде 30 дена.
Законските измени, исто така, предвидуваат и рокот за плаќање на обврските на јавниот сектор кон Фондот за здравствено осигурување да се намали од 90 на 60 дена. Така следната година јавниот сектор чии сметки се во рамки на трезорската сметка на Фондот за здравствено осигурување да ги намирува паричните обврски за 80 дена, во 2024 година за 70 дена, а во 2025 година за 60 дена.
Со измените е предвидено и Министерството за финансии да ги плаќа фактурите доставени до трезорот за покус период. Така овој рок за Министерството, односно трезорот се намалува од 30 на 15 дена. Измени има и кај исплатата од трезорот на Фондот за здравствено осигурување на Македонија кон приватниот сектор. Рокот на овие исплати се намалува од 45 на 30 дена.
Дополнително со законот е нагласено дека доколку не се исполни паричната обврска во роковите утврдени во Законот, на субјектот од јавниот сектор кој го направил прекршокот, ќе му се изрече глоба во износ од 2.500 до 3.000 евра во денарска противвредност, а на одговорното лице на тој субјект ќе му се изрече глоба во износ од 100 до 500 евра во денарска противвредност.
Владата појаснува дека намалувањето на обврските на плаќање на јавниот сектор кон приватниот сектор и фондот за здравство е обврска од Директивата на ЕУ за задоцнето плаќање.
Сега останува на пратениците да ги прифатат овие измени кои ќе треба да почнат да важат од 1 јануари следната година.