АВИОН СЕ УРНА КАЈ МАЈОРКА Пилотот вршел смели акробации, летал со малолетниот син

Поранешен воен пилот и неговиот син тинејџер биле во авионот што се урна во морето кај островот Мајорка. Авионот бил забележан како се урива во морето во близина на туристичкиот град Солер кратко по 20 часот во саботата, откако бил виден како изведува акробации во воздух, вклучувајќи „смели, но легални“ вртења од 360 степени, објави Дејли Меил.

Патниците биле опишани локално како поранешен американски воен пилот на шеесетина години кој живее во Германија и има куќа за одмор на Мајорка и кој моментно работи како комерцијален пилот.

Сведоци рекле дека авионот извршил серија смели акробации од брегот пред да се врати на аеродромот Бинисалем, од каде што полетал претходно во текот на денот за да го земе својот патник.

Полицијата утрово потврдила дека специјализираните нуркачи продолжуваат со потрагата по патниците откако ги лоцирале остатоците од двоседниот спортски авион „Тим Рокет Ф-4 Рејдер“, кој може да достигне брзина од над 400 км/ч.