Жителите на Гостивар се очекува до крајот на оваа недела да добијат техничка вода, додека кон крајот на следната недела би можело повторно да имаат и безбедна вода за пиење.

Ова вечерва го изјави директорката на Институтот за јавно здравје (ИЈЗ), Марија Андоновска, во гостување во Дневникот на ТВ Сител, повикувајќи се на информациите добиени од експертските тимови кои работат на терен.

– Според информациите што ги добиваме од експертските тимови, очекувањата се до крајот на оваа недела граѓаните да добијат техничка вода, а кон крајот на следната недела и вода за пиење – рече Андоновска.

Андоновска информираше дека Институтот за јавно здравје двапати излегол на терен во Гостивар за земање примероци од водата.

Првото земање примероци било извршено минатиот четврток попладне на четири локации, а второто во понеделникот на две локации, претежно на јавни површини.

Според неа, резултатите се разликуваат од локација до локација.

– На одредени места има отстапувања во микробиолошките параметри и во нивото на резидуален хлор. Добро е што физичко-хемиските анализи во моментот се исправни. Во дел од примероците е утврдено присуство на колиформни бактерии и мезофилни аероби, додека кај други нема микробиолошка неисправност, но има недостаток на резидуален хлор – објасни директорката на ИЈЗ.

Таа нагласи дека, според важечките правилници, овие резултати значат дека водата од тие мерни места во моментов не е безбедна за пиење.

Андоновска појасни дека Институтот за јавно здравје не е институцијата што има законска обврска да врши редовен мониторинг на квалитетот на водата.

– Не постои закон или правилник според кој ИЈЗ има обврска да врши мониторинг на водата. Ние располагаме со современи лаборатории, опрема и стручен кадар, но анализи правиме само кога ќе бидеме повикани од надлежен инспектор или кога тоа ќе го побара јавното комунално претпријатие – рече таа.

Според неа, јавните комунални претпријатија се должни да вршат редовни анализи на водата, но самите избираат која акредитирана институција ќе ги спроведува испитувањата.

Осврнувајќи се на претходните анализи, Андоновска откри дека ИЈЗ минатата година извршил едно испитување на примерок од водата во Гостивар, како и едно оваа година.

– Анализата направена во 2025 година покажала неисправност во одредени параметри. Кога ќе утврдиме неисправен примерок, за тоа ги известуваме институцијата што го побарала испитувањето и Агенцијата за храна и ветеринарство. Тоа не значи дека ИЈЗ носи одлука дека водата не смее да се користи, туку дека во конкретниот примерок е утврдена неисправност и надлежните треба да утврдат дали проблемот е локален или се однесува на целиот водоводен систем – истакна директорката на ИЈЗ.

The post ВО ДЕЛ ОД ПРИМЕРОЦИТЕ ИМА КОЛИФОРМНИ БАКТЕРИИ Андоновска објасни зошто водата во Гостивар не смее да се пие appeared first on plusinfo.mk.

Од Јавната установа Национален парк „Пелистер“ информираа дека поради наглото заладување и ниските температури, дождот на највисоките делови од планината преминал во снег.

„Променливото време и ниската температура дождот го претворија во снег, со што Пелистер, како крал на планините во Македонија, и понатаму останува непредвидлив и моќен“, соопштија од ЈУ НП „Пелистер“.

Фотографијата од снежниот врв е направена од вработените на пунктот на Националната радиодифузија на врвот Пелистер.

Наглата временска промена се почувствува и во Битола. Додека вчера во 17 часот биле измерени 26 Целзиусови степени, денеска во истиот термин температурата изнесувала само 12 степени, односно за само едно деноноќие е забележан пад од 14 степени, а температурата продолжува да се намалува.

The post СРЕД ЛЕТО ПАДНА СНЕГ НА ПЕЛИСТЕР Наглиот пад на температурите донесе зимска слика appeared first on plusinfo.mk.

Водата од градскиот водовод на Валандово од денес е повторно во целосна употреба, согласно документот издаден од надлежната Агенција за храна и ветеринарство, со кој се укинува досегашната забрана за пиење на водата, соопшти денес на прес-конференција градоначалникот на Валандово, Ѓоко Камчев.

Првичната информација се објави во средата преку соопштение на ЈП „Комунален сервис“ од Валандово, во кое беше наведено дека согласно добиени резултати од Институтот за јавно здравје во Скопје, во водата за пиење од градскиот водовод во Валандово е утврдено зголемено ниво на арсен, па поради тоа се препорачува да не се користи за пиење. Вчера, пак, градоначалникот Камчев, презентираше нови резултати од вонредна анализа спроведена од истиот Институт во која е наведено дека измерената концентрација на арсен е 1,47 микрограми на литар, односно влегува во дозволените граници.

– Валандово како град, и населените места Чалакли, Дедели и Раброво, беа засегнати од квалитетот и безбедноста на водата за пиење во изминатиот период. Бевме сведоци на ситуација во која многумина наседнаа на одредени приказни водени паралелно со ситуацијата во Гостивар. Можам слободно да кажам и поради тоа што бев директор на јавното комунално претпријатие пред 15 и повеќе години, дека квалитетот на водата во Валандово од она што го гледам во анализите не е променет од тогаш до денес. Бунарскиот систем којшто го користи Валандово постои од 1989 година – посочи Камчев.

Според документите од Институтот за јавно здравје во Скопје, кои денес Камчев ги презентираше на јавноста, од ноември до сега, односно од поставување на нов в.д. директор на комуналното претпријатие по последните локални избори, направени биле двете задолжителни контроли на водата, во кои меѓу другото се проверуваат и тешките метали, а законски се пропишани да се прават два пати во годината, согласно правилник на Агенцијата за храна и ветеринарство.

– За да нема забуна во јавноста, редовните примероци се земаат и испитуваат еднаш или двапати во неделата во зависност од ситуацијата и немаат врска со овие периодични анализи кои се задолжителни за комуналното претпријатие двапати годишно. На 26.1.2026 е направена првата ваква анализа, од кога сум јас градоначалник на Валандово, а на 2.7.2026 е направена втората – рече Камчев.

Тој објасни дека поради покажаната повисока вредност на втората анализа, која изнесувала 14 микрограми на литар присуство на арсен во водата, на 20 јули побарал нова вонредна анализа, која бидејќи се однесувала само на проверка на металите, се изработила во побрз рок и за три дена односно на 23. јули ги добиле резултатите за нормално прсуство на арсен од 1,47 микрограми на литар.

– Не можам да дадам целосни одговори, но сметам дека во периодот кога се започнува со поголемо пумпање на водата од бушотините, веројатно тогаш одредени таложени елементи кои се сепак присутни во трагови ја даваат повисоката вредност – смета Камчев и додаде дека ја повикува јавноста да ги следи препораките и анализите од стручната јавност, а не од коментари по социјалните мрежи.

Тој најави дека во наредниот период ќе се прават уште вонредни анализи на водата, за да се следи нејзиниот квалитет. Камчев се осврна и на тоа што се правело во изминатите осум години.

– Во 2025 година, е направена вондредна анализа на манган во водата, која никаде ја нема во архивите на комуналното претпријатие. Исто така, иако имале обрвска во 2024 да направат две анализи, согласно спомнатиот правилник, направена е само една периодична анализа, каде концентрација на арсен е 1,282, значи блиску до сегашната вредност. Во 2025 немаме две законски периодични анализи, во 2023 е направена само една, со вредност на арсен 1,84, во 2022 има само една периодична анализа, но нема испитувани хемиски елементи, односно арсен – соопшти Камчев.

Според него, од 2018 до 2021 година воопшто не биле правени вакви анализи.

– Ќе поставам прашање до СДСМ антитоксична да ни дадат одговор на овие прашања, бидејќи од осум години колку што имаат раководено со комуналното прептријатие тие од потребните 16 периодични широки анализи на водата имаат направено само две. Да им одговорат на граѓаните дали во тој перод навистина имаат направено анализи или немаат заведено во архивата затоа што не им одговарало или не си ја извршиле својата должност сите директори кои во тој период беа на функција во ова претпријатие – рече градоначалникот на Валандово.

Тој ги повика сите надлежни институции да влезат во јавното комунално претпријатие и да направат контрола за да им дадат одговор на граѓаните за вистинската состојба со водата и работата на комуналното претпријатие во изминатите години.

The post ВОДАТА ВО ВАЛАНДОВО ПОВТОРНО МОЖЕ ДА СЕ ПИЕ Укината е забраната по резултатите кои покажаа зголемено ниво на арсен appeared first on plusinfo.mk.

Во согласност со податоците што министерот за надворешни работи и надворешна трговија Тимчо Муцунски ги добил од клучни безбедносни институции – Агенцијата за разузнавање и Агенцијата за национална безбедност, нема конкретна информација за закана кон нашата држава од Техеран откако Иран претходно ѝ се закани на Бугарија дека ќе ја смета за непријателска земја поради најавеното распоредување американски воени авиони на нејзина територија.

– Тоа се прашања што постојано се разгледуваат во контекст на НАТО, ние, ќе повторам – сме земја-членка на НАТО, така што нашата безбедност е опфатена во рамките на таа колективна безбедносна организација. ​Секако, постојано на дневно ниво се анализираат ризиците што доаѓаат. Во согласност со последните информации што со мене се споделени како министер за надворешни работи од страна на двете клучни безбедносни институции, а тоа се Агенцијата за разузнавање и Агенцијата за национална безбедност, некоја конкретна информација за закана кон нашата држава од таква природа нема – рече Муцунски во одговор на новинарско прашање дали Македонија има некакви закани поради нејзиното членство во НАТО и поддршката на американските операции во заливот.

Но, како што рече министерот Муцунски, затоа се тука безбедносните институции, кои, како што нагласи, одлично соработуваат и споделуваат информации со сите наши партнерски служби, за и да има некоја закана, да се најде соодветен начин и истата да се превенира.

The post НЕМА ЗАКАНИ КОН МАКЕДОНИЈА ПОРАДИ ПОДДРШКАТА НА ВОЕНИТЕ АКЦИИ НА САД ВО ЗАЛИВОТ Муцунски за безбедносната состојба на земјата appeared first on plusinfo.mk.

Прашањата во контекст на човековите права, а уште потесно во контекст на непочитта на човековите права на Македонците коишто живеат на територија на Бугарија, се прашања што ние ги активираме постојано и на кои сме многу ангажирани преку нашето работење во Советот на Европа, рече денеска министерот за надворешни работи и надворешна трговија Тимчо Муцунски.

Прашањето за човековите права, вели тој, е многу значајно во делот на функционирањето на оваа институција, со чиј Комитет на министри земјава ќе почне да претседава од 2028 година.

Министерот Муцунски нагласи дека како државна институција е активна во сѐ што е поврзано со примената на пресудите на Европскиот суд за човекови права.

– Ние сме прилично активна земја по повеќе предмети, но меѓу другото и предметите поврзани со ОМО Илинден-Пирин и со други невладини организации на територија на Бугарија.​ За жал, поради долгогодишна грешка од пред 15, 20, па и повеќе години, ние не сме странка во тие постапки, иако сме можеле да бидеме, но тоа било погрешна одлука донесена во тој период. Меѓутоа, како земја членка на таа организација, имаме право да даваме свој импут и свои гледишта и тоа активно го правиме во Комитетот на министри, каде што инсистираме на доследно спроведување и целосно имплементирање и спроведување на пресудите на Европскиот суд за човекови права, бидејќи тоа го сметаме како значајно цивилизациско достигнување во денешна Европа – рече Муцински во одговор на новинарско прашање на денешната прес-конференција.  ​

Тој појасни дека ние го преземаме претседавањето со Советот на Европа во 2028 година и оти периодот од една ипол година ќе биде искористен за подготовки.

– Ние веќе влегуваме во процес на подготовка за тоа претседавање. Презентираме наши приоритети, разговараме и со земјите коишто биле претседавачи пред нас или ќе бидат по нас, за колку што може повеќе да имаме и координирани приоритети во рамките на тоа претседавање. Така што тоа е еден процес за којшто ние од мултилатерална гледна точка и како институција, но и како држава, постојано се подготвуваме – рече Муцунски.

The post МАКЕДОНИЈА ПОСТОЈАНО ГИ АКТИВИРА ПРАШАЊАТА ЗА ЧОВЕКОВИТЕ ПРАВА НА МАКЕДОНЦИТЕ ВО БУГАРИЈА Земјава се подготвува да претседава со Советот на Европа во 2028 година appeared first on plusinfo.mk.

За време на викендот времето во Македонија ќе биде стабилно со мала до умерена облачност, информираат од Управата за хидрометеоролошки работи.

Нови врнежи од дожд, проследени со локална нестабилност, се очекуваат во понеделник. На поединечни места ќе има услови за пороен дожд и грмежи.

Од вторник повторно следува период на стабилно и претежно сончево време, со постепен пораст на дневните температури.

The post ЗА ВИКЕНДОТ СТАБИЛНО ВРЕМЕ, ВО ПОНЕДЕЛНИК ПОВТОРНО ДОЖД Од вторник сончево appeared first on plusinfo.mk.

Комитетот за светско наследство на УНЕСКО на годишната сесија, што се одржува во јужнокорејскиот град Бусан, донесе одлука да го одложи впишувањето на Охридскиот Регион на листата на светски културни и историски наследства во опасност. Ова, како што истакна министерот за надворешни работи и надворешна трговија Тимчо Муцунски, претставува значаен дипломатски успех за нашата земја, кој е производ на координирана државна акција предводена од претседателот на Владата​.

Покажавме, вели Муцунски, дека дипломатијата не е само учество на меѓународни собири, туку способност преку партнерство да се создава доверба и да се заштитат најзначајните државни и национални интереси. ​Одлуката на УНЕСКО е потврда на нашата посветеност, но и поттик за уште поинтензивна работа во периодот што следува.

– Во првичниот предлог на одлуката беше предвидено регионот веднаш да биде впишан на листата на светско наследство во опасност. ​Со усвојувањето на амандманот оваа формулација е отстранета. Охридскиот Регион во оваа фаза нема да биде ставен на листата на светско наследство во опасност и ќе го задржи статусот на светско природно и културно наследство на УНЕСКО – рече Муцински на прес-конференцијата во Владата.

Ова, според него, претставува значаен дипломатски успех за нашата земја.

– Овој резултат е производ на координирана државна акција предводена од претседателот на Владата. ​Во целиот процес работевме во тесна координација со Министерството за култура и туризам, Министерството за транспорт, Министерството за животна средина и просторно планирање, општините Охрид и Струга, како и со нашата амбасада во Париз, која имаше важна улога во комуникација со УНЕСКО и со државите членки на Комитетот за светско наследство. ​Во изминатиот период водевме интензивни разговори, спроведовме дипломатски консултации и градевме поддршка меѓу државите членки на Комитетот. ​Јасно ги претставивме нашите позиции, ги презентиравме преземените обврски и политичката волја за заштита на Охридскиот Регион. ​Работевме посветено, координирано и со јасна цел – преку дијалог да ги приближиме ставовите, да ја зајакнеме довербата кај нашите партнери и така ја обезбедивме потребната поддршка за финалната одлука – рече Муцунски.

Тој нагласи дека Охридскиот Регион претставува природно и културно богатство од исклучителна универзална вредност, чие значење ги надминува националните граници. ​

– Охридското Езеро со својата природна уникатност, биолошка разновидност и богато културно-историско наследство е непроценливо светско добро. ​Како дел од светското наследство на УНЕСКО, регионот е симбол на нашата историска и културна традиција, но и на регионалната соработка, одржливиот развој и заедничката грижа за природното и културното наследство. ​Одлуката на УНЕСКО е потврда на нашата посветеност, но и поттик за уште поинтензивна работа во периодот што следува. ​Јасно ги прифаќаме сите препораки на Владата за заштита и одржлив развој на регионот. ​Со дипломатскиот ангажман обезбедивме дополнителен простор за исполнување на преземените обврски и спроведување на стратегискиот план за рехабилитација до 2030 година – истакна министерот Муцунски. ​

Во следниот период, заедно со Албанија, треба да биде подготвена временски ограничена рамка за спроведување на Планот, а до 1 февруари 2027 година да биде доставен нов извештај за постигнатиот напредок.

Комитетот за светско наследство на УНЕСКО на годишната сесија, што се одржува во јужнокорејскиот град Бусан, донесе одлука да го одложи впишувањето на Охридскиот Регион на листата на светски културни и историски наследства во опасност. На државата ѝ е даден дополнителен рок од пет години за да ги спроведе препораките поврзани со заштитата на природното и културното наследство.

The post ГОЛЕМ ДИПЛОМАТСКИ УСПЕХ Е ЗАДРЖУВАЊЕТО НА СТАТУСОТ НА ОХРИД Македонија доби уште 5 години за да ги спроведе препораките на УНЕСКО appeared first on plusinfo.mk.

Во моментов има застој на сообраќајот на кружниот тек кај хотелот „Национал“ на влезот во Кочани. Информациите од теренот велат дека е истечено големо количество нафта од камион, приближно еден тон.

Врз местото каде што е истечена нафтата се посипуваат песок и пилевина за да биде впиена а потоа отстранета од коловозот.

Според првите информации, камионот излегувајќи од индустриската зона нагазил на решетката која е паралелна со рабниците, таа отскокнала, удрила во резервоарот за гориво, го пробила и нафтата се излеала.

Екипите на КЈП „Водовод“, ТППЕ и ОВР – Кочани се на терен. Велат дека сообраќајот бргу ќе биде вратен во функција. 

The post ТОН НАФТА СЕ ИЗЛЕАЛ ВО КОЧАНИ Нафтата истекла од камион, сообраќајот во застој appeared first on plusinfo.mk.

Соединетите Американски Држави синоќа објавија воведување царини од 10 или 12,5% на увоз од 60 држави, со образложение дека тие не успеале да воведат или не применуваат ефикасна забрана за увоз на стоки произведени со принуден труд.

„Трговските партнери што презеле обврска да воведат и ефикасно да применуваат забрана за увоз на стоки произведени преку принуден труд ќе подлежат на царина од 10%, додека трговските партнери што не усвоиле таква забрана ќе подлежат на царина од 12,5%“, се наведува во соопштението на американската администрација.

Меѓу засегнатите производи има и одредени стоки од Европската Унија, соопшти Канцеларијата на американскиот трговски претставник (USTR).

Дополнителните царини ќе се применуваат на поголемиот дел од увозот од засегнатите трговски партнери, почнувајќи од 00:01 часот по источноамериканско време денеска (04.01 часот по Гринич).

Од мерките ќе бидат изземени стоките што веќе се натоварени на бродови, се наоѓаат во завршна фаза од транспортот и за кои царинската документација била завршена пред 28 јули.

Веднаш на најавите реагираа ЕУ, Австралија, Нов Зеланд.

Високата претставничка на Европската Унија за надворешна политика и безбедност, Каја Калас, ги посочи како неосновани тврдењата за недостатоци во контролата врз принудниот труд во Унијата.

-Тоа не може да се каже за Европската Унија – изјави Калас во изјавата дадена во Манила, каде се одржува Самит на АСЕАН.

Притоа таа истакна дека, споредено со САД, европското трудово законодавство предвидува платени одмори и високи стандарди за условите на работа.

– Затоа ова навистина не е оправдано – оцени Калас, најавувајќи дека ЕУ ќе бара дополнителни објаснувања од Вашингтон.

Таа посочи дека ЕУ ги исполнила обврските од трансатлантскиот трговски договор постигнат минатата година и дека новите царини ги доживува како „шок“.

– Имавме договор со Америка и се придржувавме до тој договор, до тој дел од договорот. Затоа е непријатно изненадување што договорот не се почитува – изјави поранешната премиерка на Естонија, Каја Калас.

На најновата одлука реагираа и Канбера и Велингтон.

Австралискиот министер за трговија и туризам, Дон Фарел, изјави дека новите царини воведени од американскиот сојузник се „неоправдани“.

– Овие царини се неоправдани, не се во согласност со нашиот договор за слободна трговија и треба да бидат укинати- изјави Фарел.

Неговиот новозеландски колега, Кристофер Луксон, исто така со осуда на новите американски царини нарекувајќи ги како „исклучително разочарувачки“.

Истрагата што ја спроведоа САД за утврдување дали нивните трговски партнери целосно ги отстраниле од своите синџири на снабдување производите произведени преку принуден труд, „не обезбеди значајни докази во прилог на тврдењата за принуден труд“, напиша Луксон на социјалната платформа „Икс“.

The post СВЕТОТ СЕ ШОКИРА ОД НОВИТЕ ЦАРИНИ НА ТРАМП Дополнителни 10% за 60 земји бидејќи дозволуваат принудна работа appeared first on plusinfo.mk.

Првиот човек на Центарот за управување со кризи (ЦУК), Стојанче Ангелов, информираше дека во Гостивар во текот на вчерашниот и денешниот ден се доставени 200.000 литри пакувана вода за пиење, како помош за граѓаните поради проблемот со загадувањето на водоводниот систем.

На прес-конференцијата по состанокот на кризниот штаб во Гостивар, Ангелов посочи дека водата е обезбедена преку донации од Министерството за локална самоуправа и Општина Неготино.

Тој нагласи дека паралелно со обезбедувањето вода за пиење, се работи и на обезбедување доволни количества техничка вода за потребите на граѓаните и институциите.

– По потреба можеме да обезбедиме дополнителни количества флаширана вода, онолку колку што е неопходно граѓаните на Гостивар да имаат доволно вода за пиење. Денеска до жителите на Општина Гостивар е доставена повеќе од 100 тони техничка вода – рече Ангелов.

Тој информираше дека за надминување на состојбата се ангажирани 13 цистерни за вода и еден камион со резервоар.

– Во моментов во Гостивар има осум цистерни, а уште пет пристигнуваат во секој момент, заедно со камионот со резервоар – додаде Ангелов.

Според него, цистерните се распоредени на повеќе локации:

Општа болница Гостивар – цистерна со 5,5 тони техничка вода,

Здравствен дом Гостивар – цистерна со 2 тони техничка вода,

Детска градинка – цистерна со 8 тони техничка вода,

ОВР Гостивар – цистерна со 6 тони техничка вода.

Ангелов најави дека дополнителна помош ќе пристигне и од други општини и од Армијата.

За Гостивар се обезбедени:

Неготино – една цистерна од 6 тони,

Кавадарци – една цистерна од 6 тони,

Армијата на Македонија – две цистерни (10 и 6 тони),

Дебар – една цистерна од 2 тони со можност за транспорт на вода за пиење,

Тетово – една цистерна од 9 тони,

Струга – една цистерна од 12 тони,

Охрид – една цистерна од 6 тони,

Скопје – една цистерна од 10 тони,

Кичево – еден камион со резервоар од 3 тони

– Овие цистерни, во договор со локалната самоуправа, се распоредуваат таму каде што е најпотребно. Водата за цистерните се полни од околните извори заради заштеда на време, што овозможува нивно повеќекратно полнење и празнење во текот на денот – рече Ангелов.

Градоначалникот на Гостивар, Ваљбон Лимани, посочи дека на состанокот на кризниот штаб биле донесени препораки и заклучоци за понатамошно справување со состојбата.

Тој информираше дека ЈП „Комуналец“ – Гостивар, во соработка со експертскиот тим од ЈП „Водовод и канализација“ – Скопје, веќе започнало активности за што поскоро обезбедување техничка вода за граѓаните, а потоа и вода за пиење.

– Сакам да им се заблагодарам на сите општини, колегите градоначалници, општествено одговорните компании, но и на централната власт за целата организација и поддршка, со цел што побрзо да се нормализира состојбата во Општина Гостивар – рече Лимани.

На прес-конференцијата се обрати и потпретседателот на ЗЕЛС, Изет Меџити, кој порача дека помошта за Гостивар е надвор од политички, етнички или други поделби.

– Тука сум со искрен, човечки пристап, целосно надвор од партиските, етничките, верските или кои било други определби. И централната власт, и локалната власт, но и самите општини веднаш реагираа. Сите придонесуваат на свој начин за нормализирање на состојбата и за граѓаните што побрзо да добијат чиста вода за пиење – рече Меџити.

Тој изрази благодарност до сите што помагаат, дел со техничка вода, дел со вода за пиење, а дел со професионални услуги и експертиза.

The post ЦИСТЕРНИ ОД ЦЕЛА МАКЕДОНИЈА ПРИСТИГНУВААТ ВО ГОСТИВАР Обезбедени вода за пиење и техничка вода appeared first on plusinfo.mk.