Фискалната отпорност, одговорното управување со јавните финансии и создавањето простор за реакција при идни кризи се клучни за стабилноста и растот на македонската економија во услови на зголемена глобална неизвесност, беше истакнато денеска на регионалната конференција „Охрид 2026“.

Министерката за финансии Гордана Димитриеска-Кочоска оцени дека фискалниот простор мора да се создава пред да биде потребен.

– Фискалната отпорност не се гради во моментот кога кризата ќе започне. Таа се гради претходно – преку одговорно управување со јавните финансии, постепено намалување на дефицитот, внимателно управување со јавниот долг, подобра наплата на приходите и повисок квалитет на јавната потрошувачка – рече Димитриеска-Кочоска.

Таа истакна дека иако дел од земјите во регионот не се дел од еврозоната, тие се дел од европскиот економски простор преку трговијата, инвестициите, финансиските текови, пазарот на труд и синџирите на снабдување, поради што економските движења во еврозоната директно влијаат врз економиите од Западен Балкан.

Според неа, пандемијата, енергетската криза, високата инфлација, геополитичките тензии, нарушувањата на глобалните синџири на снабдување и зголемените трговски бариери покажале дека неизвесноста повеќе не е исклучок, туку трајна карактеристика на економското окружување.

Македонија во такви услови, рече таа, избрала пат на постепена и одговорна фискална консолидација, а паралелно работи на подобрување на планирањето и управувањето со јавните инвестиции, дигитализацијата, модернизацијата на даночната администрација и борбата против сивата економија.

Таа нагласи дека следниот циклус на раст во Западен Балкан не може да се темели само на поголема потрошувачка, туку мора во поголема мера да биде воден од продуктивноста, со силен акцент на стратешките инвестиции во инфраструктурата и енергетиката.

Како четири принципи на политиката што ја следи Македонија – стабилноста, отпорноста, инвестициите и продуктивноста.

На потребата од внимателно водење на економската политика се осврна и професорот од Економскиот факултет Борче Треновски, кој оцени дека Македонија, како мала, отворена и извозно зависна економија, е особено ранлива на глобалните економски шокови.

– Колку сме поотворени и поизвозно зависни, толку сме поранливи на глобалните ризици. Поврзани сме со европската економија, поврзани сме со германската економија, а поврзани сме и со странските директни инвестиции – рече Треновски.

Тој посочи дека економските политики можат да ги ублажат надворешните ризици, но не можат целосно да ги отстранат, особено во услови на глобални превирања, ризици од инфлација, неизвесност околу каматните стапки и забавување на економскиот раст.

Треновски предупреди и на ризиците поврзани со јавниот долг, кој, како што посочи, е околу 60 проценти, во услови кога глобалните финансиски потреби се исклучително високи.

– Ако дојде до зголемување на каматните стапки и до влошување на глобалните економски услови, ние сме во ситуација кога мораме повторно да се задолжиме за да се раздолжиме. Ако растат каматните стапки, имаме и тука дополнителен ризик – рече Треновски.

Според него, евентуалното забавување на економскиот раст би го отежнало отплаќањето на постојните долгови и кредити, додека државата истовремено би морала да носи политики за заштита на стандардот на граѓаните и бизнисите.

Поранешниот хрватски министер за финансии Здравко Мариќ, осврнувајќи се на искуството на Хрватска, порача дека во добри економски времиња проблемите не треба да се ставаат „под тепих“, туку дека токму тогаш треба да се создава простор за справување со идните кризи.

– Треба да најдеме заштеди во различни сегменти и трошоците да ги усогласиме со приходите – рече Мариќ, посочувајќи дека во 2016 година буџетскиот дефицит бил намален на под еден процент од БДП, а почнало да се намалува и учеството на јавниот долг во БДП.

Тој нагласи дека за подобрувањето на позицијата на Хрватска бил важен и конструктивниот, продуктивен, отворен и транспарентен дијалог со Европската комисија и Европската централна банка.

Тој посочи и дека зголемените издвојувања за одбрана претставуваат дополнителен притисок врз  јавните финансии и го ограничуваат просторот за маневар на државите.

Во рамки на Форумот во Охрид се одржа и панел-дискусијата на тема „Од притисокот во еврозоната до фискална отпорност: Буџетски приоритети, реалности во приватниот сектор и регионални лекции“, на која ќе се разговара за влијанието на економските движења во Европа врз јавните финансии и деловното опкружување во регионот.

На конференцијата учествуваат министри за финансии, директори на даночни администрации, владини претставници и економски експерти од земјите во регионот. Собирот има цел да придонесе кон зајакнување на фискалната отпорност, одржливиот економски развој и регионалната соработка во услови на сè покомплексна глобална економска средина.

The post КАКО МАКЕДОНИЈА ЈА ИЗДРЖУВА КРИЗАТА И ОБЕЗБЕДИ РАСТ НА ЕКОНОМИЈАТА? Димитриеска-Кочоска откри кои чекори се клучни appeared first on plusinfo.mk.

Со исхрана од риби уловени од дојранските рибари или од туристите, повредениот пеликан од Дојран ја помина првата недела од заздравувањето, откако ветеринарна амбуланта од Богданци му укажа медицинска помош за прострелната рана од сачмарка под крилото.

Посетителите од кампот до плажата „Стејџ“ раскажуваат дека цела недела пеликанот се одомаќинил покрај нивниот брег, чекајќи храна од рибарите или од туристите кои рекреативно рибарат. Меѓу нив е и скопјанката Силвана Костова, која најмногу се зближила со оваа птица.

Силвана неодамна објави видео на социјалните мрежи кадешто го гали пеликанот и упати јавен апел да се најде некој што би ја заменил во хранењето на птицата, бидејќи кон крајот на неделата заминува за Скопје.

Таа за МИА раскажува дека на почетокот пеликанот се тргал од луѓето, не покажувал доверба и стоел настрана. Но, полека ја здобил довербата, посебно кон неа, бидејќи таа најчесто му обезбедувала по некое свежо рипче.

– Денес го нема, а тука спиеше секоја вечер. По мене одеше насекаде, а и по другите кампери овде. Влегуваше во водата кога се капевме, секаде одеше по мене. Навечер дури и во дворчето ми влезе, дотолку се припитоми, но потоа кога отидов до аптека и се вратив веќе го немаше. Денес цел ден го нема. Го барав насекаде, ни недостасува, бидејќи се навикнав на него, но изгледа е подобро и затоа летнал – вели Костова.

Таа се сеќава каков бил првите денови кога го забележале на брегот, целиот стуткан, без да се поместува.

– Првпат го видов долу на брегот кај чамците, каде што излегуваат рибарите. Беше целиот стуткан, не мрдаше и си реков ова пилево готово е. Потоа се досетив, мажот ми фаќа по некое рипче, така како хоби, а имам и мачка во дворот, чувам по некое за неа, па си реков ајде да му дадам. Потоа забележав како да се подобри малку. Од тогаш почна секој ден да доаѓа, наутро, на ручек, навечер – раскажува Силвана.

Наскоро птицата станала нејзин верен придружник и ја следела насекаде.

– Малку по малку почна и во вода да влегува со мене, ќе плеснам со рацете да ме следи и тој ме слуша. А вчера, пак, ми беше ставена лежалката надвор, тој дојде до мене и легна тука да спие, како право милениче. Кога станував, веднаш и тој тргнуваше по мене, одеше и бараше риби во кофичката каде обично му фрлавме по нешто од уловеното. Јас толку се грижев, што и од рибите што ги имав во фрижидерот му одмрзнував по една и му давав. Полека почна и да плива со мене кога ќе влезев во езеро, насекаде одеше по мене – вели Костова.

Таа слушнала од соседите дека пред да дојде овде, птицата била прегледана и лекувана од ветеринар, но не била присутна кога тоа се случило.

– Пред некој ден дојде и еден од постарите искусни рибари и му донесе 4 поголеми риби, а јас претходните денови веќе му имав дадено 13-тина риби, најчесто караш и црвеноперка. Како што му ги даваше големите риби, пеликанот трчаше по него чекајќи уште, значи лаком беше. Еден рибар ми кажуваше дека пеликаните сакале рибите да му ги украдат, тие така и правеле, а посебно го сакале крапот. Рибарите може да им фрлат по некој караш, но пеликаните се борат да ги земат краповите – вели низ смеа таа.

Силвана посочува дека за краткото време во кое бил гостин, пеликанот многу се припитомил, така што таа успеала да го гали, а по неа и комшиката кога почнала да му дава храна успеала да му се приближи, иако на почетокот се плашела.

Наспроти грижата на скопјанката Силвана дека пеликанот е веќе заминат, тој истиот ден беше забележан на шеталиштето во Стар Дојран, а бројни минувачи запираа за да се сликаат со него.

Пеликанот со повреда од прострелна рана две недели талкаше по вода или по копно, невообичаено блиску до луѓето и беше постојано забележуван од домашните и странски туристи, како и од мештаните. По рекациите на загрижени минувачи, ветеринарот Ристо Ичков од Богданци, во соработка со Агенцијата за храна и ветеринарство и градоначалникот на Дојран, Илија Тентов, излезе на терен и ја прегледа птицата. Ичков тогаш изјави дека за среќа пеликанот нема скршено крило, ниту нога, како што претходно се шпекулираше. Тој тогаш напомена дека птицата која најверојатно е застрелана под десното крило, добила антибиотик и витамини.

– Засега со помош на локалните власти и мештаните се обезбеди посебно место, мандра на крајбрежјето каде работи концесионерот на езерото, таму редовно има риби и птицата ќе може да биде снабдувана со храна. И понатаму ќе го следиме, ако треба нешто дополнително да му се пружи како грижа – рече тогаш Ичков.

ПЕЛИКАН СО ПРОСТРЕЛНА РАНА ДВЕ НЕДЕЛИ СКИТАЛ КАЈ ДОЈРАН Рибарите му сервираа риба, ветеринар го крена на нозе

The post ПОВРЕДЕНИОТ ПЕЛИКАН ВО ДОЈРАН ИМА ОБОЖАВАТЕЛИ Скопјанка го чува како галениче, туристи се фотографираат со него appeared first on plusinfo.mk.

Владата прави методологија за пресметка на цената за да се задржи истата цена на струјата, но се обидува македонските граѓани да имаат и поевтина струја – најави денеска при посетата на Штип претседателот на Владата, Христијан Мицкоски.

– За струјата, правиме методологија да се обидеме, ако ништо друго, барем да ја задржиме истата цена, а зошто да не и да се обидеме да ја поевтиниме – изјави Мицкоски.

Премиерот посочи дека и покрај сите предизвици, ќе има стабилно снабдување со струја.

​- Можам да кажам дека состојбата е стабилна, ќе имаме стабилна зима, ќе имаме снабдување со електрична енергија во согласност со потребите на граѓаните и бизнисот. Ние како Влада сме фокусирани на тоа, ги подготвуваме нашите производни капацитети. Грејната сезона ќе почне за еден ипол месец, еве максимум, во зависност од временските услови, некаде на почетокот на ноември, но ние ги подготвуваме енергетските капацитети, се подготвуваме за зимата и во таа насока ќе продолжиме и понатаму да се фокусираме – вели Мицкоски.

Тој додаде дека  акумулациите се на ниво од речиси 50%.

– Цела Европа се соочува со низок водостој на реките. Ова лето се исклучуваа нуклеарни централи, термоцентрали, хидроцентрали. Ние тоа не го правевме, напротив. Работиме со план, чекор по чекор. Знам дека не е сè идеално, знам дека е тешко, но е многу подобро за разлика пред три години – рече Мицкоски.

The post ЦЕНАТА НА СТРУЈАТА ОСТАНУВА ИСТА ИЛИ ЌЕ СЕ НАМАЛИ Владата подготвува нова методологија за нејзина пресметка appeared first on plusinfo.mk.

Со обезбедени 180 милиони евра „Алказар енерџи“ го заокружи финансирањето на првата фаза  од проектот „Ветерен парк“ во Штип. Со тоа, како што објави денеска раководоството на компанијата, се преминува во следна фаза на реализација на инвестицијата од над 500 милиони долари. Тоа е една од трите фази што треба да овозможат 396 мегавати електрична енергија во ветерниот парк, кој ќе содржи вкупно 54 ветерни и ќе биде најголем во регионот.

– Денес завршуваме со финансиската конструкција за 131 мегават и 21 турбина, со 180 милиони евра инвестиции, што се обезбедени од ЕБРД, ИФЦ, Ерсте банка заедно со Шпаркасе банка. Не можам да го кажам името на компанијата, но можам да кажам дека таква компанија покажува доверба во држава како Македонија – рече Даниел Колдерон, коосоновач и генерален директор на „Алказар енерџи“ на настан во Штип во присуство на премиерот Христијан Мицкоски, министри и претставници на финансиските партнери.

Колдерон најави дека кога ќе биде готов ветерниот парк ќе обезбедува енергија за 148 000 домаќинства, ќе бидат заштедени 570 илјади тони ЦО2, а  ќе се овозможат околу 300 вработувања.

Премиерот Христијан Мицкоски најави дека инвестицијата на „Алказар енерџи“ во ветерниот парк во Штип, Радовиш и Карбинци, ќе овозможи неколку стотици работни места, нова патна инфраструктура, како и еден тераватчас (речиси еден милион мегаватчасови) електрична енергија од обновливи извори.

Според него, малкумина верувале дека денеска ќе може да се види градежна механизација и се што се гради на потегот на Штип, Радовиш и Карбинци.

– Денес гледаме стотици градежни машини и почеток на инсталирањето на капацитетите на ветерниците. Почнуваме инвестиција која ќе вреди половина милијарда долари, но дополнително ме охрабрува тоа што нивните планови за инвестирање во Македонија не завршуваат тука, имаат и други планови за што ќе ја имаат поддршката од Владата –  рече Мицкоски.

Министерката за енергетика Сања Божиновска оцени дека ветерниот парк Штип има значење што ги надминува границите на еден проект и на една инвестиција.

– Нашата задача е ваквите капацитети да ги поврземе со поширока цел – поголема сигурност во снабдувањето, посилна економија и помала изложеност на надворешни енергетски потреси. Не смееме енергетската иднина на Македонија да ја оставиме само на условите што ги создаваат другите, мораме да ја градиме со капацитетите кои ги создаваме тука.  Токму во тоа е и улогата на Министерството за енергетика.  Нашата институционална поддршка за ветерниот парк е дел од определбата да поддржуваме инвестиции во обновливи извори со предвидливи правила и со долгорочна развојна насока – рече Божиновска.

Мицкоски зборуваше и за идните потенцијали на државата за инвестиции во енергетиката и потсети на изјавата на претседателката на Европската комисија Урсула Фон дер Лајен на бизнис форум во 2025 дека Балканот може да биде хаб преку кој Европа ќе се снабдува со обновлива енергија.

– Имајќи го предвид развојот на вештачката интелигенција кој е неповратен процес, во следните 14-15 години Европа ќе има потреба за дополнителни 1000 терават часови електрична енергија. Поради тоа потенцијалот што може да го имаме како држава да го инвестираме во производни капацитети а потоа да произведеме е еднаков на 24 терават часови. Кога тоа ќе се помножи со цената на струјата зборуваме за две милијарди евра годишно бизнис што треба да го зголеми македонскиот БДП и да придонесе позитивно за македонската економија. Со оглед на целта да бидеме крстосница на овој дел од регионот и за енергетската инфраструктура на врвот на приоритетите ја ставаме поддршката на ваков тип гринфлд инвестиции – рече Мицкоски.

The post „АЛКАЗАР ЕНЕРЏИ“ ЗАПОЧНА ДА ГО ГРАДИ ВЕТЕРНИОТ ПАРК ОД ПОЛОВИНА МИЛИЈАРДА ДОЛАРИ ВО ШТИП Треба да обезбедува струја за 148.000 домаќинства и заштеда од 570.000 тони јаглерод диоксид appeared first on plusinfo.mk.

Компанијата Google ќе инвестира најмалку 13 милијарди евра (15,1 милијарди долари) во изградба на инфраструктура за вештачка интелигенција во Финска во следните две години и го потпиша својот прв договор за нуклеарна енергија надвор од САД, соопшти денеска компанијата.

Инвестициите ќе вклучуваат центри за податоци, подобрувања на електричната мрежа и проекти за чиста енергија и батерии што ќе ги поттикнат услугите како што се Gemini, Search, Maps и YouTube, соопшти Гугл.

Ова е најголема поединечна инвестиција на технолошкиот гигант во Европа досега.

Ќе се градат три нови дата-центри

Проектот, кој е планиран за реализација во периодот меѓу 2027 и 2028 година, треба да овозможи изградба на најмалку три нови центри за податоци (data centers), како и дополнително проширување на нивниот постоечки голем центар во крајбрежниот град Хамина. Новите локации ќе бидат во Кајани, Мухос и Вала во северниот дел на земјата. Google претходно купи земјиште во северна Финска за евентуална изградба на центри. Локациите беа избрани за да се искористи постојната електрична мрежа во близина на извори на енергија без јаглерод.

-Овие локации, лоцирани на силни точки на електричната мрежа, придонесуваат за целокупниот електроенергетски систем и во исто време овозможуваат економски развој на мрежата- изјави Аста Сихвонен-Пунка, извршен директор на операторот на преносниот систем Фингрид.

Центрите за обработка на податоци ќе бидат подготвени и за системи за обновување и користење на отпадната топлина.

Телекомуникацискиот оператор Elisa и провајдерот на мрежна инфраструктура Nokia ќе обезбедат поврзување на новите центри за обработка на податоци, според соопштението.

„Новата дигитална инфраструктура ќе служи како градежни блокови за финската и пошироката европска дигитална подготвеност, иновации и развој на вештачката интелигенција“, соопшти компанијата.

Финскиот премиер Петери Орпо изјави дека одлуката на Гугл е „јасен доказ за нашите силни страни“.

-Вредноста на економијата на податоци се протега многу подалеку од директните инвестиции во поттикнување на иновации, истражување и развој – додаде тој.

Компанијата проценува дека проектот за време на фазата на изградба ќе поддржи повеќе од 37.000 работни места низ целата земја, од кои приближно 16.000 ќе бидат во градежниот сектор. Откако системите ќе станат целосно оперативни, се очекува изградбата на овие дата центри да придонесе со 3,6 милијарди долари во финскиот БДП и да поддржува околу 7.000 работни места годишно.

Гугл истовремено инвестира и во обезбедување струја за најавените дата- центри 

Компанијата склучи и 22-годишен договор со финската државна енергетска компанија Fortum за откуп  до 50% од капацитетот на нуклеарната централа Ловиса. Ова е нивен прв договор за нуклеарна енергија надвор од САД. Дополнително ќе се инвестира во ветерни паркови и батериски системи за стабилизација на мрежата.

-Ова е првиот договор за нуклеарна енергија на Google надвор од САД и сметаме дека тоа е навистина важен камен-темелник за сè што правиме тука – изјави во Хелсинки главната инвестициска директорка на американската компанија, Рут Порат.

Google објави дека ја проширува и енергетската инфраструктура потребна за имплементација на проекти, склучува нови договори за користење на енергијата на ветерот и инсталира систем на батерии од 94 мегавати на локацијата во Кајани, што ќе придонесе за балансирање на електричната мрежа.

Fortum и Google, исто така, ќе го истражат развојот на нова нуклеарна и обновлива енергија во Финска, соопштија компаниите.

Во својата изјава, компанијата Фортум изјави дека долгорочниот договор за купување обезбедил економска сигурност за доживотно продолжување и надградба на електраната Ловииса до 2050 година. Централата се наоѓа во близина на центарот за податоци Хамина на Гугл.

Цената на акциите на Фортум порасна за 10% надминувајќи го зголемувањето од 1,4% на индексот на акции во Хелсинки.

Зошто Гугл ја избра Финска за оваа инвестиција?

Финска е избрана поради нејзината студена клима (што драстично ги намалува трошоците за ладење на серверите) и изобилството на стабилна, нискокарбонска електрична енергија.

Освен обилните количини на енергија со ниски емисии, студената клима на Финска ги намалува трошоците бидејќи ја намалува количината на енергија потребна за справување со топлината произведена од центрите за податоци.

Во последниве години, многу центри за податоци се лоцирани во нордиските земји поради даночните олеснувања и достапноста на обновлива енергија. Финска ја зголеми стапката на обновлива енергија во последните неколку години.

Аналитичарите сметаат дека потрошувачката на енергија во центрите за податоци значително ќе се зголеми поради користењето на вештачката интелигенција, што Google го наведе како една од причините за својата инвестициска одлука.

Гигантот најави уште една инвестиција во Европа. Засега е познато дека Google сака да изгради нови центри за податоци во Холандија и Белгија.

„Алфабет“ во чиј состав е Гугл оваа година ги зголеми своите глобални инвестиции на помеѓу 195 и 205 милијарди долари, бидејќи се стреми да ја опфати растечката побарувачка за компјутери.

За Финска, оваа инвестиција ќе претставува значителен поттик во време кога земјата се обидува да го врати економскиот раст.

Нордиската земја се соочува со слаба побарувачка, колапс во трговијата со соседна Русија и последици од фискалното затегнување насочено кон ставање на јавните финансии под контрола. Стапката на невработеност надмина десет проценти и достигна највисоко ниво во Европската Унија.

Годинава и други технолошки компании најавија инвестиции во Европа . Amazon изјави дека ќе инвестира 33,7 милијарди евра до 2035 година за да ја зајакне својата инфраструктура во облак и центри за податоци во Шпанија, додека Microsoft изјави во септември минатата година дека ќе вложи 30 милијарди долари во инфраструктура за вештачка интелигенција и постојните операции во Велика Британија до 2028 година.

The post ГУГЛ ЌЕ ИНВЕСТИРА 13 МИЛИЈАРДИ ЕВРА ВО ДАТА-ЦЕНТРИ ВО ФИНСКА Компанијата потпиша и договор за купување енергија за период од 22 години appeared first on plusinfo.mk.

Авиокомпанијата „Ер Србија“ во претстојната зимска сезона неделно ќе реализира 14 летови на релацијата Белград – Скопје со што ги зголемува услугите кон македонскиот главен град.

Авиокомпанијата минатата недела закажа 14 летови неделно меѓу двата главни града од 25 октомври, што резултираше со двојна дневна услуга.

Ревидираниот распоред претставува зголемување од првично планираните единаесет неделни ротации, како и од десетте неделни услуги што се вршеа во текот на претходната зимска сезона.

Сите летови се планирани да се одржуваат со турбопропелерскиот авион ATR72-600.

The post „ЕР СРБИЈА“ ОД ОКТОМВРИ ЌЕ ЛЕТА ДВА ПАТИ ДНЕВНО СКОПЈЕ – БЕЛГРАД Претходната зима авиокомпанијата неделно леташе 10 пати на оваа релација appeared first on plusinfo.mk.

Владата и Железници – Транспорт работат на зголемување на линиите меѓу Скопје и Куманово, бидејќи цените на билетите се далеку поевтини, најави денеска од Куманово, вицепремиерот и министерот за транспорт, Александар Николоски.

Николоски рече дека сега билетот за патување со воз од Куманово до Скопје во еден правец е 87 денари, а во двата правца е 140 денари.

– Жителите на Куманово кои патуваат со воз до своите работни места или до факултетите во Скопје месечно ги чини 1.850 денари. Што е далеку поевтино од кој било друг превоз кој што може да се најде. Да не зборувам дека кога се патува со возило или со автобус, не знаете кога ќе стигнете, колку ќе има гужва и така натаму. Така што возот дефинитивно е најбрзо средство за комуникација, најевтино, а и најеколошко, и ќе правиме силна промоција во следниот период да се користи – изјави Николоски кој присуствуваше на примопредавање на нови комунални возила во Куманово.

Тој истакна дека минатата недела стартуваше градскиот воз во Скопје, а веќе ефектите се добри. Досега оваа линија ја имаат користено 1.500 патници и тоа за само три дена.

– Очекувам навистина, во едно брзо време да стигнеме до 100.000 патници кои го користеле градскиот воз.​ Вториот проект е меѓуградски воз помеѓу Скопје и Куманово. Знаете дека пилот има и во моментов, двапати дневно сообраќа воз на линија Нова железничка станица – станица Куманово. Работиме заедно со Железници – Транспорт на интензивирање и зголемување на фреквенцијата, затоа што цените се далеку, далеку поевтини-вели Николоски.

The post ЌЕ ЗАЧЕСТАТ ВОЗОВИТЕ ОД СКОПЈЕ ЗА КУМАНОВО Цената на билет во една насока е 87 денари appeared first on plusinfo.mk.

Растот од 22% во градежништвото е историски највисок квартал, оцени денеска вицепремиерот и министер за транспорт Александар Николоски кој присуствуваше во Куманово на примопредавање на новите комунални возила набавени од Светска банка.

Николоски истакна дека се работи за исклучително висок раст, и раст кој што не е феномен само за вториот квартал, туку е континуитет уште од минатата година.

-Ние во 2024 година ги поставивме темелите, ги поставивме проектите и веќе од 2025 гледаме силен развој во делот на градежништвото. Секој квартал е далеку, далеку над она што било просек претходно. Ова е историски највисок квартал- рече Николоски.

Министерот за транспорт посочи дека на терен се завршени градежни работи со вредност од 242 милиони евра и тоа за само 3 месеци, а како што рече „споредено со истиот период минатата година, растот е околу 22%, а и минатата година имаше раст“.

-Навистина градежништвото станува основен двигател на економијата и ќе продолжиме тоа да го правиме во следниот период – да реализираме уште доста бројни проекти кои што ќе значат сериозен раст на градежништвото, а со тоа и на бруто-домашниот производ- рече Николоски.

The post ИСТОРИСКИ НАЈВИСОК РАСТ НА ГРАДЕЖНИШТВОТО ВО ВТОРИОТ КВАРТАЛ За три месеци се завршени градежни работи во вредност од 242 милиони евра appeared first on plusinfo.mk.

Во изминатото деноноќие во државата биле регистрирани 42 пожари на отворен простор, од кои пет се активни, пет се ставени под контрола, а 32 се изгаснати, соопшти Центарот за управување со кризи (ЦУК).

Според податоците заклучно со 7.30 часот, активни се пожарите кај селата Грачани и Никиштани во Општина Ѓорче Петров, при што огнот е активен и на територијата на Косово, потоа во месноста Рамно кај селото Брест во Општина Чучер-Сандево, на потегот меѓу селата Буринец, Локов и Селце во Струшко, кај селото Белица во Општина Македонски Брод и кај селото Милетино во Општина Брвеница.

Под контрола се пожарите кај селата Кнежино и Добреноец, како и кај селото Тајмиште во Општина Кичево, пожарот кај селото Копаница во Општина Сарај, пожарот на градската депонија во Делчево и пожарот меѓу селата Руѓинце и Орах во Општина Старо Нагоричане.

Во текот на вчерашниот ден целосно се изгаснати 32 пожари на повеќе локации низ државата, меѓу кои во општините Петровец, Гази Баба, Студеничани, Чучер-Сандево, Ѓорче Петров, Сарај, Теарце, Кратово, Куманово, Липково, Берово, Штип, Струга, Кичево, Долнени, Битола, Новаци, Гевгелија, Ново Село, Струмица, Крушево, Охрид и Градско.

The post СЀ УШТЕ ГОРИ КАЈ МИЛЕТИНО И КАЈ ГРАЧАНИ Пожарникарите се борат и со огнот во село Брест appeared first on plusinfo.mk.

Албанскиот премиер Еди Рама повика на промена на начинот на кој Европската Унија ги интегрира земјите од Западен Балкан, оценувајќи дека постепената интеграција е најреалниот пат кон членство.

Рама ова го кажа на форумот „Intelligence on the World, Europe and Italy“ во Чернобио, Италија, каде учествуваше на панелот „Агенда за Европа“.

Според него, земјите-кандидатки не треба да чекаат полноправно членство за да бидат вклучени во конкретни европски политики и институции.

Тој предлага постепено отворање на европскиот пазар и другите механизми на Унијата за земјите-кандидатки, при што тие би добивале права и обврски според областите во кои ги исполнуваат условите.

– Не ни треба право на вето за да седнеме на маса. Ни треба сè да биде на маса – рече Рама.

Тој смета дека процесот треба да почне од заедничкиот пазар, образованието, науката и истражувањето, наместо земјите да чекаат да ги затворат сите преговарачки поглавја пред да почувствуваат конкретни придобивки од интеграцијата.

Рама предупреди дека не верува оти сегашниот модел може да доведе до брзо проширување на Унијата.

– Не верувам дека 2027 година среќно ќе нè чека со нашето право на вето – рече тој, објаснувајќи дека не очекува земјите членки лесно да прифатат нови членки со целосно право на блокирање одлуки.

Албанскиот премиер го критикуваше и сегашниот пристап, според кој земјите-кандидатки прво треба да поминат низ долг процес на исполнување на критериумите и затворање на поглавјата, а дури потоа да станат дел од процесот на одлучување.

Тој предложи променет редослед – земјите да бидат поблиску до европските институции и постепено да добиваат конкретни права, додека паралелно ги исполнуваат условите за полноправно членство.

Рама употреби и метафора со „седумте деца“ на претседателката на Европската комисија, Урсула фон дер Лајен, мислејќи на земјите што се во процесот на приближување кон ЕУ.

Според него, сите тие треба да бидат „околу масата“ на Европската Унија, иако во различни статуси.

– Ако го затворите поглавјето за наука, култура, образование, за тоа станувате член и имате исти права – рече Рама.

Тој порача дека колку повеќе земјата добива од европскиот систем, толку повеќе треба да придонесува, но истовремено мора да има место во процесот.

Идејата за постепена интеграција не е нова. Во февруари годинава Рама и српскиот претседател Александар Вучиќ предложија побрза интеграција на подготвените земји-кандидатки во единствениот европски пазар и Шенген-зоната, без тие во почетната фаза да добијат целосни институционални права и право на вето.

Во меѓувреме, и Франција и Германија поддржаа идеја за „структурирана постепена интеграција“ на земјите-кандидатки, со можност постепено да добиваат пристап до одделни европски формати и политики.

Предлогот на Рама, сепак, не значи дека земјите би биле ослободени од реформите. Напротив, постепената интеграција подразбира исполнување на европските критериуми и правила во секоја област во која кандидатот сака да биде интегриран.

The post РАМА БАРА НОВ МОДЕЛ ЗА ПРОШИРУВАЊЕ НА ЕУ Кандидатите да влезат на масата без право на вето appeared first on plusinfo.mk.