Галерија ФЛУ – Факултет за ликовни уметности во Скопје го најавува проектот „Аудиоекологија“, видео и аудио перформанс на Стефан Шашков и Дориан Јовановиќ кој преку звукот ја истражува суштината на современиот човек.

Станува збор за проект кој се занимава со онтолошки прашања – прашања за суштината на постоењето, за суштината на човекот и неговиот обид да го пронајде сопствениот ритам во свет што е премногу бучен, преполн со цивилизациски шумови, куп информации и урбан хаос. Наспроти тоа, природните звуци во проектот ја симболизираат тишината, редот и стабилноста на светот што постои независно од човечките интервенции.

Како што вели уметникот Ацо Станковски во описот на настанот:

– Денеска во ова совремие имаме еден огромен цивилизациски хаос, цивилизациски шум… Една неверојатна мешавина на слики и звуци. Нешто што продира од сите страни и воспоставува еден глобален вознемир. Тој вознемир се шири насекаде. Но сепак, се уште има зони каде природата го чува својот природен звук, односно, својот контролиран хаос, хаос на преживување и живеење, хаос од таа страна на реалноста и хаос од оваа страна, кој е хаос во нашите глави, а всушност е еден космички поредок.

„Аудиоекологија“ ја материјализира оваа идеја преку аудиовизуелна интервенција каде звукот не е само естетски елемент, туку и инструмент за интроспекција.

Ова не е прв заеднички проект на Шашков и Јовановиќ. Пред две години тие во Чифте амам го претставија мултимедијалниот проект – „Капење“.